Орал соты бард әнші, азаматтық белсенді Жанат Есентаевты қамау мерзімін екі айға ұзартты деп хабарлады Азаттыққа оның адвокаты Лариса Симоненко. Есентаевқа қылмыстық кодекстің 174-бабының 1-тармағы бойынша ("Әлеуметтік, ұлттық, рулық, нәсілдік, таптық немесе діни араздықты қоздыру") айып тағылған.
17 мамырда Есентаев үш күнге қамалған еді. Бұдан бір күн бұрын оның пәтеріне полиция тінту жүргізіп, ұялы телефоны мен жеке компьютерін алып кеткен.
18 мамыр күні кешке Орал соты жергілікті үш белсенді - Исатай Өтепов, Бауыржан Әліпқалиев және Айболат Бөкеновті 15 тәулікке әкімшілік қамауға алған.
Қазақстанда кейінгі екі-үш күнде полиция қысымы күшейіп тұр. Билік қазақстандықтар жер кодексіне енгізілген өзгерістерге қарсы митингке шығады деп қауіптенеді. Freedom House халықаралық ұйымы бұған дейін Астананы қамалған белсенділерді дереу босатуға шақырған.
Ел президенті Нұрсұлтан Назарбаев ауыл шаруашылығы жерлерін сату және шетелдіктерге жалға беру жөнінде жер кодексіне енгізілген өзгерістерді жүзеге асыруға жыл аяғына дейін мараторий жариялады. Қазір жер реформасы бойынша құрылған комиссия заңды қайта қарап жатыр.
