Саддам Хұсейннің үлкен қызы Рагад әкесіне етене жақын жүргендерді сатқындық жасады және Бағдадты басып алуға АҚШ-қа қолдау көрсетті деп кінәлады. Рагад мәлімдемесін “Аль-Арабия” телеарнасына берген сұхбатында жасады. Рагадтың айтуынша, Саддам Хұсейнді сатып кеткендер - әкесінің ең сенімді, жақын адамдары. Бұрынғы диктатордың қызы әкесінің қазір қайда екені жайында ештеңе білмейтіндігін айтты.
Рагад пен оның сіңілісі Рана балаларымен Иорданияда тұрып жатыр. Мұнда оларға гуманитарлық тұрғыдан баспана берілді.
