КИЕВ. Ресей газының импорты туралы Мәскеу мен Киев арасындағы қол қойылған жаңа келісімнен саяси жанжал шыққан Украинада бүгін үкіметтің отырысы өтеді. Сейсенбі күні Украина парламенті – Жоғарғы Рада – орыс газын 2 есе қымбатқа сатып алатын осы келісімге бола премьер-министр Юрий Ехануровтың үкіметін тарату мәселесін дауысқа қойып, оны басым дауыспен мақұлдады. Президент В.Ющенко парламенттің бұл әрекетін “конституцияға қарама-қайшы” деп бағалап, наурыз айындағы парламент сайлауына дейін үкімет қалады деп мәлімдеді. Газдың бағасы туралы талас-тартыс Ресейдің Украинаға баратын газды жауып, Мәскеу мен Киевтің қарым-қатынасын күрт нашарлатқан болатын.
