КАБУЛ: Ауғанстандағы АҚШ авиациясының әуе соққысынан 3 британ жауынгерінің қаза болуынан кейін АҚШ бастаған коалициялық күштер соғыс авиациясын қолдануын ақтауға тырысады. Кеше Кабулда өткізген баспасөз-маслихатында Ауғанстандағы НАТО күштерінің бас өкілі, неміс полковнигі Мартин Шеллис АҚШ ұшағының бомбасынан британ жауынгерлерінің қаза болуын “қайғылы жайт” деп бағалап, “бірақ әуе соққысы - коалициялық күштердің іс-қимылының маңызды бөлігі екенін” атап көрсетті. Өткен бейсенбі күні оңтүстіктегі Гильменд өлкесінде тәліптерге қарсы кескілескен шайқасы кезінде АҚШ авиациясын британ әскерінің өзі көмекке шақырған көрінеді. АҚШ пен Ұлыбритания бұл оқиғаны тергейтіндерін мәлімдеді.
