Орталық Азия елдері басшыларының Бішкектегі басқосуында трансшекаралық өзендерді пайдалану жөнінде біртұтас саясат орнату мәселесі талқыланбақ, — деп хабарлайды «Қазақстан Бүгін». Сырдария бассейнінің су-энергетика ресурстарын тиімді пайдалану жөнінде Орталық Азия елдері ортақ шешімге келе алмай отыр. Өзбекстан өзенге трансшекаралық мәртебе берілуін талап етсе, Қырғыз үкіметінің өкілдері электр қуаты есебінен өтемақы өндіруге мүдделі. Таяуда Алматыда осы мәселені талқылап, мәмілеге келе алмаған тараптар енді Бішкектегі саммитте тағы да оны сарапқа салмақ.
