Қазақстан президенті Нұрсұлтан Назарбаев Малайзия премьер-министрі Наджиб Тун Разакқа ұшақ апатына байланысты көңіл айту жеделхатын жолдады. Бұл туралы президенттің баспасөз қызметі хабарлады.
Жеделхатта «Malaysia Airlines компаниясының Амстердамнан Куала-Лумпур қаласына ұшқан лайнерінің Украина аумағында құлап, көп адамның қаза болғаны туралы қайғылы хабарды Қазақстан президентінің күйзеліспен қабылдағаны» жазылған.
Нұрсұлтан Назарбаев Қазақстан халқы және өз атынан Наджиб Тун Разак пен қаза тапқан азаматтардың туған-туыстары мен жақындарына көңіл айтқан.
17 шілде күні Malaysia Airlines әуе компаниясының Boeing 777 ұшағы зымыран шабуылынан Украинаның Донецк облысындағы Торез қаласы маңына құлағаны хабарланған еді.
Амстердамнан Куала-Лумпур қаласына қарай 10 мың метр биіктіктегі халықаралық әуе коридорымен ұшып бара жатқан ұшақ Ресей әуе кеңістігі аумағына кіруге 50 километр қалғанда құлаған еді. Ұшақ бортындағы 298 адам түгел қаза тапқан.
Украина сыртқы істер министрі кеңесшісі Антон Геращенко "ұшақты ресейшіл сепаратистер "Бук" зениттік зымыран кешенімен атып түсірді" деп мәлімдеді. Алайда сепаратистер апатқа Украина әскерін кінәлап отыр.
Украина арнайы қызметі Малайзия ұшағы апатына сепаратистердің қатысы бар екенін білдіретін аудиожазбаны жариялады.
