Ресей бас прокуроры Юрий Чайка Ресейдің қазақстандық оппозициялық саясаткер, бұрынғы банкир Мұхтар Әблязовті Қазақстанға «экстрадициялау ниеті жоғын» мәлімдеді. Бұл туралы Чайка бүгін Астанада коррупциямен күрес жөніндегі мемлекетаралық кеңес отырысынан кейін айтты.
«Қазір [Мұхтар Әблязовті] экстрадициялау жөнінде мемлекеттік кеңес деңгейінде шешім шығуы тиіс. Егер ондай шешім қабылданса, онда ол Ресейге эксрадицияланады. Оған Ресейде айып тағылады» деген Юрий Чайка.
Қазақстандық «БТА банктің» бұрынғы басшысы Мұхтар Әблязов 2013 жылдың жазынан бері Францияның оңтүстігінде Украина мен Ресейдің қаржылық алаяқтық туралы айыптауы негізінде қамауда отыр. Қазақстан азаматтарын экстрадициялау туралы Астана мен Париждің арасында келісім жоқ.
Бұған дейін Франция соты Мұхтар Әблязовті Ресейге экстрадициялау туралы шешім шығарып, Франция премьер-министрі Мануэль Вальс тиісті жарлыққа 17 қыркүйекте қол қойған. Қазақстан билігі Әблязовті «БТА банктің» алты миллиард доллар ақшасын жымқырды деп айыптайды. Мұхтар Әблязов өзіне тағылған айыптардың саяси негізі бар деп санайды.
Әблязовтің отбасы Мәскеу оппозициялық саясаткердің жеке басының қауіпсіздігін қамтамасыз ете алмауы және істі әділ қарамауы ықтимал деп, Франция билігін экс-банкирді Ресейге бермеуге шақырады.
