Қазақстанның Еуропа Одағына кіру жоспары жоқ және бұл одаққа қатысты прагматикалық саясат ұстанады деп мәлімдеді Қазақстан парламенті сенатының спикері Қасым-Жомарт Тоқаев. Бұл туралы бүгін сенаттың ресми сайтында жарияланған Тоқаевтың Сингапурдегі "Азия және әлем: Ортақ мүмкіндіктер, бірлескен көркею" атты форумда жасаған баяндамасында айтылады.
Сенат спикері ЕО Қазақстан үшін ірі сауда әріптесі және инвестициялық серіктес саналатынын айтып, Қазақстан үш ай бұрын ЕО-мен жақын әріптестік және ынтымақтастық туралы келісімге қол қойғанын айтқан.
2 сәуірде өткен форумда сөйлеген Тоқаев "Еуропаның астан-кестен өзгерістер кезеңіне тап келгенін", "енді оның қайтадан бұрынғыдай болмайтынын" мәлімдеген. "Террорлық шабуылдар, тарихта бұрын-соңды болмаған миграциялық дағдарыс, қаржы дағдарысы, Ұлыбританияның Еуропа Одағына (ЕО) мүше болу мәселесі Еуропа енді бұрынғы қалпында болмайды деген қорытынды жасауға мәжбүрлейді" деген Тоқаев.
Бірақ ол ЕО-ның әлеуетін жете бағаламауға болмайтынын жеткізген. "Одақ өз мүшелері мен басқа да елдер үшін тартымды болып отырғандықтан қиындықтарды еңсере алады және институционалдық тұрғыдан жетіле береді" деген Тоқаев.
