Ирактың Мосул қаласында «Ислам мемлекеті» экстремистік тобының содырлары 1600 адамды кепілге алып, оларды әуе шабуылы кезінде «тірі қалқан» ретінде пайдаланып отыр. Бұл туралы жұма күні БҰҰ жаңалықтар орталығы хабарлады.
БҰҰ-ның адам құқығы жөніндегі жоғарғы комиссары басқармасының хабарлауынша, Мосулда жихадшылар әуе шабуылынан қорғану үшін бейбіт тұрғындарды кепілде ұстап отырғаны және 400-ге жуық езид, күрд немесе мұсылман шиит әйелдерді тұтқынға алған.
Мосулдың маңындағы Каджали елді мекенінде сәрсенбі күні жихадшылар 180 адамды өлтіргені туралы ақпарат тарады. «Мосулдың өзінде террористер 200-ге жуық адамды өлтірген болуы мүмкін» делінген хабарламада.
БҰҰ-ның адам құқығы жөніндегі жоғарғы комиссары басқармасының баспасөз хатшысы Равина Шамдасанидің айтуынша, «содырлар кепілге алған адамдарды жаппай өлтіруді жалғастырып жатыр». Сонымен бірге жихадшылар өз қатарына 9-10 жасар балаларды күштеп тартып, оларға қару беріп Мосулдағы соғысқа пайдаланып отыр дейді Шамдасани.
Жихадшылар Хаммам әл-Алил қаласы тұрғындарын жүк көліктеріне салып Таль-Афар қаласына апарған. БҰҰ жаңалықтар орталығының хабарлауынша, кейбір отбасыларына оларды Сирияға әкететіндерін айтқан.
