Сәуірдің 4-і күні сенат үш жылдық бюджет туралы заң жобасына Назарбаев кеңсесінің шығынын қосып, толықтыру үшін жобаны мәжіліске қайтарып берді. Бұған дейін Назарбаев кеңсесін құруға бюджеттен 1 миллиард теңге бөлінетіні хабарланған.
Сәуірдің 2-сі күні Қазақстанның қаржы вице-министрі Татьяна Савельева 2019 жылдың республикалық бюджетіне үш бағыт бойынша түзету енгізілгенін және астана атауын өзгерту үшін қосымша қаржы бөлінбейтінін айтқан.
"Шығынның артуы көп жағдайда [бюджет қызметкерлерінің] жалақыларын көбейтуді 1 шілдеден 1 маусымға ауыстырумен байланысты. Бір айдың өзі 37 миллиард теңге көлемінде қосымша шығынды талап етеді. Қалған ақша ендігі тіркеліп қойған жаңа мемлекеттік органды - елбасы кеңсесін құруға жіберіледі" деді Савельева.
Сәуірдің 4-і күні сенат депутаттары сонымен бірге Ұлттық қордан әлеуметтік салаға кепілді трансферт бөлу (250 миллиард теңге) туралы заң жобасын да мақұлдаған. 2019 жылғы республикалық бюджеттің шығыны кіріспен салыстырғанда шамамен бес триллион теңгеге артық.
ПІКІРЛЕР