16 мамырда Нұр-Сұлтан қалалық әкімдігіне қырыққа жуық ана келіп, баспана мен жәрдемақы мәселесіне шағынды. Наразылар арасында көп балалы, жалғызілікті және мүгедек бала бағып отырғандар бар.
Аналардың айтуынша, биліктің баспана мәселесін шешу үшін ұсынған бағдарламалары тиімсіз. Олар үкіметтен үйді алғашқы жарнасыз, банк комиссиясынсыз беруді сұрайды. Баспана мен атаулы әлеуметтік көмек алу үшін құжат дайындағандарын айтқан аналар кедергілер көптігін де айтты.
Жиналғандар өткен айда балаларға берілетін жәрдемақыны көбейту, әлеуметтік жеңілдіктер жасау сияқты ондаған талабын жазып, Қазақстан президенті Қасым-Жомарт Тоқаев пен премьер-министр Асқар Маминге, парламент депутаттарына хат жолдаған. Әкімдікке жиналған аналар өздерінің хаты қайырылған билік өкілдеріне емес, еңбек және халықты әлеуметтік қорғау министрлігіне жеткеніне наразы.
Әкімдік алдына 10.30 шамасына жиналған аналарға қала әкімі де, орынбасарлары да шықпаған соң наразылар Астана экономикалық форумы өтіп жатқан Конгресс орталығына бет алды. Наразылар форумға бара жатқан соң әкімдік өкілі шығып, қала әкімі Бақыт Сұлтановтың орынбасарлары аналарды кездесуге шақырғанын айтты. Бірақ аналар "олардың ештеңе шешпейтінін" айтып, әкімдікке қайтуға келіскен жоқ.
Конгресс орталығы алдына келген аналар баспана мәселесі қажытқанын айтып шағынды. Аналар "Елбасы! Елбасы!", "Ана мен бала құқығы қорғалсын!" деп айқайлады. Полиция мен арнаулы жасақ қоршауға алған наразы аналарға қалалық полиция департаментінің өкілі Бақытжан Малыбаев тарауға шақырды.
Азаттық Конгресс орталығы алдынан тікелей эфир жүргізіп жатыр.
БАҚ аналар бара жатқан жиынға - Астана экономикалық форумына Қазақстан президенті Қасым-Жомарт Тоқаев пен экс-президент Нұрсұлтан Назарбаев қатысатынын хабарлаған.
2019 жылы 4 ақпанда Астананың Көктал-1 шағын ауданындағы Шыңғыстау көшесінде орналасқан жеке үйдің ауласындағы уақытша баспана өртеніп, бір отбасындағы бес бала опат болған. Осы оқиғадан кейін Қазақстанда көп балалы аналар наразылығы күшейген.
ПІКІРЛЕР