Стамбул келісімінен кейін Украина миллион тонна ауыл шаруашылық өнімдерін экспорттаған. Бұл жөнінде жұма күні кешке Украина президенті Владимир Зеленский мәлімдеді.
"Астық экспорты бастамасының жұмыс істеп жатқанына шамамен бір ай болды. Осы уақыт аралығында Қара теңіз, Одесса және Оңтүстік порттарынан 24 ақпаннан бері алғаш рет миллион тонна ауыл шаруашылық өнімдері экспортталды" деді Зеленский.
Оның айтуынша, Киев бұл көрсеткішті 3 миллион тоннаға жеткізуге талпынып отыр. "Бұл Африка, Азия және Еуропа үшін өте маңызды" деді Украина басшысы.
Ресей сыртқы істер министрлігі 26 тамызда БҰҰ мәліметіне сүйене отырып, шамамен 846 тонна азық-түлік экспортталғанын хабарлаған.
- Ресей мен Украина арасында БҰҰ және Түркия араласуымен "астық келісіміне" 22 шілдеде қол қойылған. Азық-түлік тиелген алғашқы кеме Одессадан 1 тамызда шыққан. Украина президентінің айтуынша, содан бері украин порттарынан әлемнің 15 еліне 40-тан астам кеме жөнелтілген.
- Украина - әлемдегі ірі астық экспорттаушы елдердің бірі.
Ресейдің Украинамен соғысының кесірінен Қара теңіз порттарында экспортқа арналған миллиондаған тонна азық-түлік жиналып қалды. Киев жағдайға Ресейді кінәласа, Мәскеу астық тиелген кемелер акваториядағы украин миналарынан шыға алмай отыр деп мәлімдеген. БҰҰ Африка мен Азиядағы кедей елдерде аштық болуы мүмкін екенін ескерткен.
