Маңғыстауда Арыстан мұнай кенішін игеретін "Кен-Сары" компаниясының жүздеген жұмысшысы билікке үндеу жолдады. 18 қазанда мұнайшылар айлықты 100 пайызға көтеруді талап етіп, бейнеүндеу жазды.
Жұмысшылар оны Қазақстан президенті Қасым-Жомарт Тоқаевқа, Маңғыстау облысының әкімі Нұрлан Ноғаевқа жолдады. Сейсенбі күні таралған видеода олар мұнайлы өңірде баға қымбат екенін алға тартып, компания төлейтін айлық еңбек нарығындағы жағдайға сай емес деп мәлімдеді. Мұнайшылардың айтуынша, Арыстан кенішінде жұмыс істейтіндер басқа да мұнай компанияларына қарағанда екі жарым есе аз айлық алады. Кәсіпорын басшылары, атап айтқанда корей инвесторлары жұмысшылардың "заңды талаптарына құлақ аспай", сол арқылы "жұмысшылар арасында әлеуметтік наразылық туғызып отыр", деп мәлімдеді үндеу авторлары.
"Кен-Сары" жұмысшыларының айтуынша, айлықты келісім комиссиясы арқылы көтеру әрекеті іске аспады. Енді олар Астанадан араша сұрайды.
Есет есімді жұмысшының Азаттыққа айтуынша, компанияда орташа айлық шамамен 200 мың теңге (400 доллардан астам) болады. Мұнайшылар жұмысты тоқтатпаған. Есеттің айтуынша, жалақыны көтеруді 300-ге жуық адам талап етті. Кәсіпорын басшылығы олардың уәжіне құлақ еспады, енді іс еңбек арбитражына дейін жетті, дейді ол.
Еңбек дауы келісім комиссиясының көмегімен шешілмеген соң, бұл мәселе еңбек арбитражы аясында мемлекеттік еңбек инспекторының қатысуымен қаралады, деп мәлімдеді жұмысшылар. Маңғыстау облысы мемлекеттік еңбек инспекциясы басқармасына тараптардың мұндай өтініші әзірге түспеді, деп мәлімдеді сейсенбі күні Азаттыққа еңбек және қауіпсіздік туралы заңдардың орындалуын қадағалау жөніндеді бөлім жетекшісі Мерей Мәжитов.
19 қазанда "Кен-Сары" компаниясы оқиғаға түсініктеме берді. Компанияның баспасөз қызметінің хабарлауынша, вахташы жұмысшылардың орташа жалақысы – сыйақы мен қарыздарды есептемегенде 340 750 теңге(725 доллар). Компания мәліметінше, кейінгі бес жылда жұмысшылар жалақысы 38,3 пайызға көбейген, компанияда ұжымдық келісім-шарт "толық көлемде орындалады".
Компания өкілі жұмысшылардың жалақы өсіру туралы шағымына орай келісім комиссиясы құрылғанын, "алайда еңбек ұжымдық дауы шешілмегенін" айтты.
"Жұмысшылар жалақыны 100 пайызға өсіруді талап етті. Олар айлықтың өзге мұнай компаниялары жұмысшыларының жалақыларымен теңескенін қалайды. Ал жұмыс беруші жалақыны 25 пайызға өсіруді ұсынды" деді компания өкілі.
Кеніш өкілдерінің айтуынша, қазіргі кезде келісім комиссиясының жұмысы аяқталған, ұжымдық еңбек дауы еңбек арбитражына берілмек.
Арыстан мұнай кеніші Бейнеу ауылынан оңтүстік-шығысқа қарай 100 шақырым жерде орналасқан.
Ашық мәліметтерге қарағанда, "Кен-Сары" компаниясы 2006 жылы Маңғыстау облысындағы Арыстан кенінде барлау жұмыстарын бастаған. Үш жылдан соң, 2009 жылы, Корей ұлттық мұнай компаниясы (KNOC) Қазқастанның "Сүмбе" (қазір KNOC Caspian деп аталады) мұнай операторын 335 млн долларға сатып алып, Арыстан және Құлжан кеніштерін өндіру құқына ие болды.
ПІКІРЛЕР