Таразда Қаңтар оқиғасына байланысты айыпталған тоғыз адамның сотында прокурор айыпталушыларға жаза сұрады. Сотқа тартылғандардың бесеуі: Тоқтар Ошақбай, Райс Рысбеков, Ержан Байжанов, Нұрсұлтан Қуатбаев пен Исатай Донбаев – былтыр алаңда мерт болған. Қалған төрт айыпталушының үшеуі – Ғани Керімбаев, Асхат Тәшекеев, Марат Бекбау осыған дейін тергеу изоляторында, біреуі – Нұрбол Ережепов ешқайда кетпеу туралы қолхатпен бостандықта болған.
26 қаңтарда прокурор айыпталушыларға мынадай жаза сұрады:
- "Жаппай тәртіпсіздік" (272-бап, 2-бөлігі) бойынша айыпталған Ғани Керімбаевқа – 3 жыл түрме жазасын, бірақ рақымшылық заңын қолданып, жазасын 9 айға дейін қысқартуды сұрады;
- "Жаппай тәртіпсіздік" (272-бап, 2-бөлігі) бойынша айыпталған Нұрбол Ережеповке 3 жыл шартты жаза, бірақ рақымшылық заңын қолданып, оны 9 айға дейін қысқартуды сұрады;
- "Жаппай тәртіпсіздік" (272-бап, 2-бөлігі) бойынша айыпталған Асхат Тәшекеевке 4 жыл түрме жазасын сұрады;
- "Жаппай тәртіпсіздік" (272-бап, 2-бөлігі) бойынша айыпталған Марат Бекбауға да прокурор 4 жыл түрме жазасын сұрады.
Ал айыпталушы төрт адам өздеріне тағылған айыптарды мойындамайтынын жеткізді. Ғани Керімбаев тағылған айыпты мойындамайтынын жеткізді, ал адвокаты істі тоқтатуды сұрады. Керімбаевтың анасы "балам жаралыларды ауруханаға апарды, бұл – қылмыс емес" деді.
Марат Бекбау сотта өзін жайсыз сезініп тұрғанын айтып, кейінірек сөйлеуге мүмкіндік сұрады. Былтыр Қаңтар оқиғасы кезінде алаңда оқ тиген Марат Бекбау тергеу изоляторынан балдақпен келді. Ол сот басталардан бұрын "мекеме ішінде медициналық көмек көрсетпейді, қатты ауырса ауруды басатын дәрі салып береді, болды" деді.
Прокурор алаңда мерт болған, "жаппай тәртіпсіздік" бабы бойынша айыпталған "бес адамның айыбы сотта дәлелденді, бірақ қайтыс болуына байланысты қылмыстық жауапкершіліктен босатуды сұраймын" деді.
Мемлекеттік айыптаушылар жарыссөз кезінде судьяға қарата "жәбірленушілер Қаңтарда болған оқиғаны "бейбіт шеру" деп атайды. Алайда бұл – бейбіт шеру емес. Президенттің өзі төтенше жағдай жариялады. Осы жайтқа назар аударуыңызды сұраймын" деді.
Бұған дейін Қаңтарда жақындарынан айырылған тараздық ата-аналар Астанадағы бас прокуратураға барып, "Таразда өтіп жатқан соттағы әділетсіздіктерді" айтып, процесті тоқтатуды талап еткен. Олар тергеу органдарында қаза болған ұлдарының бүлікке қатысы барын дәлелдейтін айғақтар жоғын алға тартқан. Бас прокуратура олардың шағымына қатысты ресми түрде мәлімдеме жасамады.
Ресми дерек бойынша, Таразда Қаңтар оқиғасы кезінде 15 адам қаза тапқан. 1 желтоқсанда Жамбыл облысының жасөспірімдерге қатысты ауданаралық соты Қаңтар оқиғасында оққа ұшқан Андрей Опушиевті " жаппай тәртіпсіздікке қатысты" деген айыппен кінәлі деп тапқан. Айыпталушы қаза тапқандықтан, сот оған жаза тағайындамаған.
ПІКІРЛЕР