Сайлау нәтижесін мойындамайтынын айтып, митингіге шығатынын жариялаған журналист Думан Мұхаммедкәрім 25 тәулікке қамалғаны хабарланды.
Бұл туралы журналистің адвокаты Ғалым Нұрпейісов Facebook желісінде жазды. Адвокаттың сөзінше, журналисті Әкімшілік кодекстің "бейбіт митинг өткізу ережесін бұзу" бабы бойынша қамаған. Думан Мұхаммедкәрім қамалғанын жақтастары журналист Динара Егеубаева мен белсенді Әлнұр Ілияшев те хабарлады.
Сот пен ресми органдар журналистің қамалуына қатысты әзірге ақпарат таратқан жоқ.
Мәжіліске кандидат болған Думан Мұхаммедкәрім кеше, 20 наурызда Алматыда өткен баспасөз мәслихатында сайлау нәтижесіне келіспейтінін айтып, жұртты бейбіт наразылыққа шақырған еді. Жиында ол "мені митингіге шығарғаным үшін осыған дейін 15 тәулікке қамаған, осы жолы 30 тәулікке қамауы мүмкін. Бірақ мен қорықпаймын" деген еді.
Кейін ол YouTube желісіндегі "Не дейді?" арнасына да видео жариялап, 21 наурызда Алматыдағы орталық алаңға барып, митингіге шығатынын тағы мәлімдеген.
YouTube-тегі арнасында билікті сынайтын видео жариялап жүрген журналист мәжіліс сайлауына кандидатурасын ұсынған, бірақ аумақтық сайлау комиссиясы Думан Мұхаммедкәрімнің тұрғылықты тіркеуі дұрыс емес деп, кандидатурасын тіркемеген. Кейін ол сотта жеңіп, кандидатурасы тіркелген. ОСК нәтижесі бойынша, Мұхаммедкәрім мәжіліске өтпеді.
Думан Мұхаммедкәрім былтыр 12 қазанда Алматы облысының мамандандырылған ауданаралық сотының шешімімен "халықты 25 қазанда митингіге шақырып, бейбіт жиын өткізу тәртібін бұзды" деген айып бойынша 15 тәулікке қамалған еді.
19 наурызда Қазақстанда мәжіліс пен жергілікті мәслихат депутаттарын сайлау өтті. Мәжілістегі 98 орынның 69-ы пропорционал әдіспен жеті саяси партия арасында бөліске түсті. 20 жылда алғаш рет бірмандатты 29 округтен мажоритар әдіспен сайлау болды. Ресми дерек бойынша, бұл орындарға 600-ге тарта кандидат таласты. Сайлау қорытындысы бойынша мәжіліске алты партия өтті. Басым орынды биліктегі "Аманат" партиясы алмақ. Бірмандатты округтер арқылы мәжіліске өткен 29 депутаттың 23-і – биліктегі "Аманат" партиясының мүшесі.
Халықаралық бақылаушылар жаңа өзгеріс біршама бәсеке тудырғанын атап өтті. Сайлауды бақылаған ЕҚЫҰ-ның Демократиялық институттар және адам құқықтары бюросының (ДИАҚБ) сайлауды бақылау миссиясы "сайлау саяси өмірге бәсеке әкелгенімен, әртүрлі әкімшілік кедергілер әлі бар" деп мәлімдеді. Сайлауға өз-өзін ұсынған бірнеше кандидат дауыс беруді мойындамайтынын жариялап, сотқа шағымданды.
- Қазақстанда жұрт бейбіт митингіге шығу үшін әкімдіктерге алдын ала ескерту беруге тиіс. Ескертілмеген митингілер заңсыз деп танылып, ұйымдастырушылары я қатысушылары жазаланады.
ПІКІРЛЕР