Алматыдағы наразылық шарасында халық билікке қандай талап қойды? Арнайы жасақ пен полиция қалай әрекет етті?
1 мамыр – Бірлік күні Алматының орталық мәдени және демалыс саябағына жүздеген адам келді. Полиция мен арнайы жасақ та көп жиналды. Мереке басы концертпен басталған. Кейін концерт аяқталған соң қолына «караоке-микрофон» ұстаған адам ортаға шығып, «елде болып жатқан жағдайлармен келіспейміз» деп айқайлап, өз талаптарын айта бастады. Бұл маңға басқа адамдар да жиналды.
Алматыдағы наразылық шарасында Астана қаласының атын "Нұр-Сұлтан" деп өзгерткен билік шешіміне қарсылар көп болды.
Жиналғандар "Біздің өз таңдауымыз бар!", "Тоқаев біздің президент емес!", "Дариға спикер емес!", "Нұр-Сұлтан астанамыз емес!", "АЭС-ке қарсымыз!", "Халық пікірімен санасыңыздар", "Көп балалы аналарға жәрдем берілсін!", "Шал, кет!" деп айғайға бастады.
Полиция наразылардың бұл әрекетін сырттай бақылап тұрды.
Наразылардың алдына прокуратура қызметкерлері, полиция, әкімдер келіп, шерудің заңсыз екенін түсіндіріп, халықтан тарауларын сұрады. Бірақ жиналғандар тараудан бас тартты.
Кейін полиция наразылық шарасына келгендердің кейбірін ұстай бастады.
Қазақстан ішкі істер министрлігінің мәлімдеуінше, 1 мамырдағы Нұр-Сұлтан мен Алматыдағы наразылық кезінде шамамен 80 адам ұсталған.
"Бас прокуратураның ескертуіне қарамастан Нұр-Сұлтан, Алматы, Семей, Қарағанды, Ақтөбеде рұқсат етілмеген митинг өтті. Шараға қатысушыларға әлеуметтік және басқа да мәселелер жайлы ойларын ашық айтуға мүмкіндік берілді. Бірақ Нұр-Сұлтан мен Алматыда бірнеше адам өздерін дөрекі ұстап, елде тыйым салынған "Қазақстанның демократиялық таңдауы" қозғалысының ұрандарын айтты" деп жазылған министрлік мәлімдемесінде.
ІІМ мәлімдеуінше, "әкімдік өкілдері мен прокурорлардың ескертуіне құлақ аспаған" азаматтарға полиция шара қолданған.
Министрлік ұсталғандардың іс-әрекетіне "заңға сай құқықтық баға берілетінін" хабарлады.
