ОРК: Сайлаушылардың 60 пайызы дауыс берді
Орталық референдум комиссиясының мәліметінше, астана уақытымен 16.00-ге дейін елде дауыс беруге құқығы бар 60,80 пайыз сайлаушы референдумда дауыс берген.
Дауыс берушілердің үлесі бойынша Қызылорда облысы (72,26 пайыз) мен Түркістан облысы (72 пайыз) алда тұр. Ең төменгі көрсеткіш – Алматы қаласында (25,95 пайыз).
ОРК астана уақытымен 14.00 шамасында «дауыс беруге құқылы азаматтардың жартысынан көбі дауыс бергенін» айтып, референдум өтті деп саналады деді.
Референдум өтіп жатқан тұста топтап бюллетень салу, тәуелсіз бақылаушыларды жібермеу сынды заң бұзушылықтар да хабарланып жатыр.
Референдумға қарсы шыққан Oyan, Qazaqstan белсендісін полиция ұстап, кейін босатты.
Алматыда полиция Арбат маңында референдумға қарсы пикет өткізген Oyan, Qazaqstan белсендісі Дархан Шәріповті ұстап әкетіп, біраз уақыттан соң босатты. Белсендінің қолында "Қанды Қаңтар ұмытылмас" деген плакат болған. Бұл жөнінде Vlast.kz сайты хабарлады.
"Тұтас реформалар пакетіне дауыс бергім келмейді. Бұл жартылай реформалар, саяси емес" деді Шәріпов. Көп ұзамай полиция оны сол жерден ұстаған. Пикет бірнеше минутқа ғана созылған.
Ақмола облысында Азаттық тілшісі мен видеооператорына учаскеден ақпарат таратуға тыйым салды
Ақмола облысы Талапкер ауылында учаскелік комиссия төрайымы Сақыпжамал Сыламбекова Азаттық тілшісі Сәния Тойкен мен видеооператор Кенжетай Ақсейітовтен №685 учаскесін түсірмеуді және ғимараттан кетуді талап етті.
Ол Азаттық тілшілеріне “тізімде жоқсыңдар” деді. Азаттық редакциясы бұған дейін сайлау учаскесінен ақпарат тарату үшін қажет барлық құжатты жолдаған.
ОРК референдумға қатысушылар 65 пайыздан асқанын хабарлады
Орталық референдум комиссиясының мүшесі Шавкат Өтемісовтің айтуынша, Нұр-Сұлтан уақытымен кешкі сағат 6-дағы жағдай бойынша азаматтардың 65 пайыздан астамы, яғни 7 млн 624 мың 641 адам дауыс берген. Елде дауыс беруге құқығы бар 11,7 млн адам бар.
ОРК мәліметінше, референдумға қатысу белсенділігі Түркістан облысында жоғары. Мұнда азаматтардың 78,24 пайызы дауыс берген. Ең төмен көрсеткіш – Алматыда. Мұнда 29,82 пайыз референдумға қатысқан.
ПІКІРЛЕР