Өткен аптада Қазақстан премьер-министрі Кәрім Мәсімовтің Twitter желісіндегі жеке парағында онлайн-конференция өткізуге қажет веб-сайт іздеген хабарландыруы жарияланды. «Көп ұсыныс түсті, белсенділіктеріңізге ризамын. Бүгін менің ресми сайтым pm.kz-де онлайн-конференцияны өткізу алаңы үшін дауыс беру басталады. Дауыс беру нәтижесі 28-сәуірде жарияланады» деп жазған еді премьер-министр.
Кәрім Мәсімовтің ресми сайтындағы онлайн-конференциядан үміткер
Азаттық радиосы сейсенбі, 26 сәуір күні осы сауалнама туралы хабарлап, өз оқырмандарын дауыс беруге шақырған. Азаттық радиосының онлайн-конференциялары аса танымал. Бұған дейін Қазақстанның бірнеше министрлері мен лауазымды тұлғалары, ньюсмейкерлері Азаттықта қонақта болған.
Ең қызығы, біз хабарландыру берген соң жарты сағат өтпей жатып Кәрім Мәсімовтің веб-сайтында Азаттық радиосы кандидатурасын қолдаушылардың үлесі 75,61 пайызға жетті! Бұл – 10 мыңға жуық адам. Бірақ тағы жарты сағат өте бере Азаттық радиосын қолдаушылардың дауыстары өшіріліп тасталды.
Қазақстан премьер-министрінің веб-сайтындағы сауалнамада Азаттық радиосын қанша адамның қолдағанын оң жақтағы скрин-шоттан анық көруге болады.
Қоғамдық өмірдің кез-келген саласымен әріптес болуға ынталы Азаттық радиосы осыған орай премьер-министрге мынандай ұсыныс жасайды: біз таяу арада Кәрім Мәсімовтің онлайн-конференциясын өткізуге дайынбыз әрі премьер-министрдің веб-сайтындағыдай ресми, бұрма нәтиже болмайтынына кепілдік береміз.
Премьер-министр Кәрім Мәсімовтің жауабын KazakhOnline@rferl.org электронды адресінде күтеміз.
