30 желтоқсанда Ресей мен Украина кезекті рет әскери тұтқын алмасты. Бұл келіссөзге Біріккен Араб Әмірліктері араағайын болды.
Тараптар айтқан тұтқын саны әртүрлі. Ресей қорғаныс министрлігі тұтқын алмасу "150 де 150" форматы бойынша өтті деп мәлімдеді. Министрлік ақпаратынша, Ресей сарбаздары Беларусь аумағына әкетілген. Оларға медициналық және психологиялық көмек көрсетіледі, туыстарына хабарласа алады деді. Украина тұтқынынан босап, еліне қайтып бара жатқан ресейліктер түсірілген кадрларды Ресейдің адам құқығы жөніндегі уәкілі Татьяна Москалькова жариялады.
Ал Украина президенті Владимир Зеленский Украинаға 150 емес, 189 әскери тұтқын оралды деп мәлімдеді. Зеленскийдің айтуынша, олардың арасында әртүрлі әскер тобының өкілі, сондай-ақ Мариупольде орыс әскері тұтқынға алған екі тұрғын бар.
Зеленский телеграм-арнасында тұтқын алмасудан кейін түсірілген суреттер мен видеоны жариялады.
Ресей мен Украина ұдайы әскери тұтқын алмасып келеді. 2022 жылғы 24 ақпанда кең көлемді соғыс басталғалы бері тараптар 59 рет тұтқын алмасқан. Осының алдында, 27 қарашада Ресей сыртқы істер министрлігі "630 да 630" форматы бойынша тұтқын алмасуға дайын екенін мәлімдеген. Украина бұл бастамаға байланысты ойын әлі айтқан жоқ.
Биыл маусым айында Ресей президенті Владимир Путин Украинада Ресейдің 1348 адамы, ал Ресейде Украинаның 6465 адамы тұтқында отыр деп хабарлаған. Тамызда Украина қарулы күштері Ресейдің Курск облысына басып кіргенде тұтқынға түскен жүздеген ресейлік сарбаздың көбі мерзімді әскери борышын өтеп жүрген жауынгерлер болып шықты.
ПІКІРЛЕР