Еуропарламент Украинадағы соғысты талқылап жатыр
Еуропарламенттің Страсбургтегі шұғыл сессиясында депутаттар Ресейдің Украинаға басып кіргенін сынға алды.
Еуропарламент Украинаның Еуропа одағына қосылу өтінішін қолдайды
Еуропарламент жиынына видео арқылы қосылған Украина президенті Владимир Зеленский елін тез арада Еуропа одағына қабылдауды сұрады. Зеленский сөзінен соң еуродепутаттар орнынан тұрып, қол соқты.
Еуропарламент Украинадағы соғысты халықаралық деңгейде тергеу жүргізуді талап етпек.
Киевтегі балалар ауруханасының жертөлесінде ондаған бала мен олардың ата-анасы жатыр. Олар мұнда бас сауғалап келген.
Украина Қырғызстан мен Грузиядағы елшісін кеңесу үшін кері шақырып алды
Украина президенті Владимир Зеленский Қырғызстандағы елші Валерий Жовтенко мен Грузиядағы елші Игорь Долговты кеңесу үшін кері шақырды. Бұл туралы Зеленский Facebook желісіндегі эфирінде айтты.
Украина басшысы Қырғызстан билігі "Украинаға қарсы агрессияны ақтағаны үшін" елшіні кері шақырып алғанын жеткізді. Зеленский Грузия билігі Украинаға ерікті түрде көмектескісі келгендерге мүмкіндік бермеді деп мәлімдеді.
Қырғызстан билігі Ресейдің Украинаға басып кіргеніне қатысты ресми ұстанымын білдірмеген. Бірақ 26 ақпанда Ресей билігінің бақылауындағы РИА Новости агенттігі "Қырғызстан президенті Садыр Жапаров Ресей президенті Владимир Путинмен телефонмен сөйлескенде кезінде Ресейдің Донбасстағы бейбіт тұрғындарды қорғау әрекетіне қолдау білдірді" деп жазған.
Бірақ Қырғызстан президентінің ресми сайтында "екі елдің басшылары халықаралық және аймақтың қауіпсіздігі бойынша, сонымен қатар Украинадағы жағдайға қатысты пікір алмасты" деп жазылған.
Жапаровтың баспасөз хатшысы Ербол Сұлтанбаев 27 ақпанда Facebook парақшасында "екі тарап жақын уақытта бейбітшілікке қол жеткізеді деп үміттенеміз. Біз бұл жағдайдың тез арада келіссөздер арқылы шешілгенін қолдаймыз" деп жазған.
Қырғызстан сыртқы істер министрі Руслан Казакбаев 27 ақпанда Орталық Азия елдері мен АҚШ-тың сыртқы істер ведомстволарының онлайн кездесуінде Бішкек Украинадағы жағдайға алаңдап отырғанын жеткізген.
"Бұл қақтығыс екі ағайын халықтың арасында болып жатыр. Қырғыз халқы орыс халқымен де, украин халқымен де бұрыннан достық қарым-қатынаста. Бірақ Қырғызстан қазір әлем бірігудің орнына бөлініп жатқанына қынжылады" деген Казакбаев.
ЕО өкілдерінің қарсылығы
Женевада өтіп жатқан БҰҰ қарусыздану конференциясы кезінде Ресей сыртқы істер министрі Сергей Лавров видео байланыс арқылы сөйлей бастағанда Еуропа одағының өкілдері залдан шығып кетті.
Еуропа одағы Ресей ұшақтарына ұшуға тыйым салған соң Лавров бұл жиынға келе алмай, тек видео арқылы қосылды.
ПІКІРЛЕР