Пәкістан президенті, генерал Первез Мушарраф Батыс пен мұсылман әлемі арасында “жаңа темір перде” пайда бола бастағанын ескертті. Швецияда сапарда жүрген Пәкістан президенті Стокгольмдегі ғылыми-зерттеу институтында сөйлеген сөзінде саяси әділетсіздік, қайыршылық пен надандық мұсылман дүниесінде діни фундаментализм мен лаңкестікке дем беріп отыр деп атап көрсетті. 1999 жылғы қантөгіссіз төңкерістің нәтижесінде билікке келген Первез Мушарраф Батысты, әсіресе АҚШ-ты және мұсылман елдерін бұқара халықтың арасында наразылық тудырған себептермен күресуге шақырды.
