Эстония бас министрі Андрюс Ансип ел астанасында екі күн болған бүліктен соң тыныштық пен төзімділікке шақырды. Ол ереуілге шыққандарды айыптады, "дүкендерді тонап жатқан мас ұрылар дүниежүзіне көрсетілді" деп сынады. Екінші Дүниежүзілік соғыс кезінде қаза тапқан совет сарбаздарына арналған ескерткіш Таллинн қаласының орталығынан алынған соң бұған жаппай наразылық танытылды. Ереуілге шыққандардың көбі орыс. Олар полициямен қақтығысты, қалада бүлік шықты. Екі күн ішінде жүздеген адам қамауға алынды, бір орыс азаматы қаза тапты.
