БАНГКОК: Тайландтың Сайлау комиссиясының Бас хатшысы Сузипон Тавичайчайагарн мәлімдегендей, елдің қарулы күштері ұсынған конституцияның жобасын жексенбі күнгі референдумда 58 пайызға жуық дауыс қолдап, 42 пайыздан сәл басым дауыс қарсы болды. Ол туралы Бас хатшы 88 мың учаскедегі дауыстарды есептеп болған соң бүгін хабарлады. Ал жексенбі күні Тайланд премьер-министрі Сураюд Чуланонт жаңа Ата заңның қабылдауына байланысты, осы жылдың соңына қарай жаппай сайлау өтетінін тағы да растады.
