АСТАНА: “Қазақстан темір жолы” ұлттық компаниясының президенті Ж.Құлекеев 100 мың АҚШ доллары көлемінде пара алмақ болды деген күдікпен қамауға алынды. Оны кеше өткізген брифингте Бас прокуратураның ресми өкілі Сапарбек Нұрпеисов хабарлады. Алайда Қазақстандағы бақылаушылар “Қазақстан темір жолына” дейінгі жауапты лауазымдарында негізінен жақсы қызметімен көрініп келген Ж.Құлекеев ресми биліктің ішіндегі түрлі топтың өзара күрес-тартысының құрбаны болған жоқ па деп күдіктенеді. Ал ұлттық компанияның президенті міндетін уақытша атқару оның 1-інші вице-президенті Қажымұрат Нағмановқа жүктелді.
