ТМД бақылаушылары Өзбекстандағы сайлауға оң баға берді

ТМД елдерінің бақылаушылары Өзбекстандағы парламент сайлауына оң баға берді. Ұйымның атқарушы комитетінің төрағасы Сергей Лебедевтің айтуынша, «төменгі палатаның депутаттарын сайлау мемлекет заңдарына және демократиялық сайлауларға тән ережелерге сай өтті».

ТМД Өзбекстандағы сайлауға 84 бақылаушы жіберді. Ал ЕҚЫҰ өз өкілдерін бұл елдегі сайлауға жіберуден бас тартқан болатын. Өзбекстанның орталық сайлау комиссиясы таратқан алдын ала мәлімет бойынша, сайлауға 15 миллионнан астам – 87,7 пайыз сайлаушы қатысты.

Жексенбі күні республикадағы төрт саяси партияның 506 үміткері заң шығарушы палатадағы 135 орынға таласты. Өзбекстанда бірде-бір оппозициялық ұйым тіркелмеген.