Уақыт бедері

Қазақстанда 2011 жылдың басынан бері үздіксіз жалғасып жатқан қымбатшылық және үкіметтік шаралар. 2011 жылы халықаралық экономикалық және қаржы ұйымдарының болжамы бойынша инфляция мен азық-түлік тағамдарына бағаның өсімі жоғары қарқында болатындығы айтылған еді. Мұның өзі дамып келе жатқан мемлекеттер үшін үлкен проблема болмақ дейді сарапшылар. Ал елдегі азық-түлік бағасының өсіміне бірнеше себептер бар болып отыр. Ең бастысы, бұған әлемдегі азық-түлік тағамына бағаның өсуі әсер етуде дейді мамандар. Мәселен, Дүниежүзілік банктің дерегі бойынша биылғы 1 ай ішінде азық-түлік тауарының бағасы 29 пайызға өскен. Оның ішінде мұнайға әлемдік бағаның құбылуы да азық-түлікке әсер етеді. Экономикалық даму және сауда министрі Жанар Айтжанованың мәлімдеуінше, Үкімет тарапынан азық-түлік бағасын ырықтандыруға қатысты бірқатар жұмыстар атқарылуда. «Біріншіден, қысқа мерзімді шаралар қарастырылады. Бұған орай әкімдіктер жанындағы әлеуметтік-кәсіпкерлік корпорацияларға қаражат бөлініп, олар халықты арзан бағадағы жеміс-жидекпен және көкөніспен қамтамасыз ететін болады. Екіншіден, сырттан келетін азық-түліктің импортына баж салығын төмендетуді қарастырып жатыр. Үшіншіден, елімізде азық-түлікті толық қамтамасыз ету, импорттық тәуелділіктен арылып, бағаны қалыпты ұстау үшін ауылшаруашылық тауарын өндірушілерге кешенді субсидиялар қарастырмақ» деп хабарлады министр.