Ресей азаматы, 34 жастағы Владимир Дринкман АҚШ-тың Нью-Джерси штатының округтік сотында өзіне тағылған хакерлік қылмысқа қатысты 11 айыптың бір де біреуін мойындамады. Өткен аптада Нидерланд елінен АҚШ-қа экстрадицияланған Дринкманға ауқымды хакерлік қылмыстар жасаған деген айыптар тағылып отыр.
Айыптау құжатында Дринкман мен оның төрт серігінің ісі - АҚШ сотында қаралған ең ірі электрондық алаяқтық іс болып отырғаны айтылған.
Айыптау қорытындысы бойынша, айыпталушы 2005-2012 жылдар аралығында банктердің мәлімет базасынан, қаржы ұйымдары мен сауда орындарынан 100-ден 200 миллионға дейін несие және дебеттік карталардың нөмірін ұрлап, сатып отырған. Алаяқтық құрбандарына келген шығын көлемі, алдын-ала болжам бойынша, 300 миллион АҚШ долларын құраған. Барлық тағылған айып бойынша Дринкманға тағайындалатын жаза - жүз жылдан көп уақытқа бас бостандығынан айыру болмақ.
Тергеу деректері бойынша, айыпталушы банктер мен қаржы ұйымдарының, сауда орындарының электрондық базаларына АҚШ-тың батысы, орталығы мен шығысында, сонымен қатар Нидерланд, Латвия, Панама мен Багам аралдарында орналасқан компьютерлерден хакерлік шабуыл жасаған.
Владимир Дринкман 2012 жылы Амстердамда тұтқындалып, ұзаққа созылған тергеу процесінен соң АҚШ-қа экстрадицияланған.