Астана қаласының орталығында үшінші күн бойы наразылық білдіріп жатқан борышкерлердің бірі Ғалия Қасенова бүгін жедел жәрдем көлігімен ауруханаға жеткізілді.
Қант диабеті және басқа да бірнеше дертке шалдыққан ол өзге борышкерлермен бірге Қазақстан президенті Нұрсұлтан Назарбаевпен кездесу мақсатында Алматыдан Астанаға барған. Борышкерлер Назарбаевқа сайлауалды бағдарламасына банктердің борышкерлерді "халықаралық талаптар бойынша" қайта қаржыландыруын қарастыратын міндеттемелер енгізуді ұсынған. Яғни борышкер қарызының 50 пайызын мемлекет төлеп беріп, ал банктер форс-мажорлық жағдайларды ескеріп, несиені жоюы тиіс.
Астананың орталығына орналасқан борышкерлермен кездесуге Ұлттық банктің үкіметпен және мемлекеттік органдармен жұмыс департаменті директоры Бақытжан Саркеев барды. Ол борышкерлерді үйлерінен шығару мәселесін сот орындаушылары зерттеп жатқанын айтты.
- Кеше біз банктермен бірге әрбір борышкердің берешегін қайта қаржыландыру мәселесіне қатысты келісөз жүргізу қажет дегенге тоқтадық. Бірақ, бұған көп уақыт қажет. Басқаша айтқанда, мәселе орнынан қозғала бастады деуге болады, - деді Бақытжан Саркеев.
Борышкерлер бірлестігінің жетекшісі Есенбек Өктешбаев президент әкімшілігінен борышкерлерді үйлерінен шығару тоқтатылатынына және ипотекалық несиеге қатысты мәселелері шешілетініне жазбаша кепілдік берілмейінше Астанаға келген борышкерлердің ол жерден кетпейтіндерін айтады.