Халықаралық валюта қоры әлемдік экономиканың өсіміне қатысты болжамының көрсеткіштерін төмендетті. Ұйым қазанның 6-сы күні жариялаған жартыжылдық есебінде биылғы өсім көлемі 3,1 пайызды, ал 2016 жылы – 3,6 пайызды құрайды деп көрсетілген.
Құжатта Қытай экономикасының даму қарқыны бәсеңдеуіне байланысты дамушы елдерде өсім бесінші жыл қатарынан тежелетіні, соның салдарынан, сұраныс азайған соң шикізаттың, оның ішінде мұнайдың бағасы қазірдің өзінде арзандап отырғаны айтылған.
Халықаралық валюта қорының мәліметтері бойынша, халықаралық санкциялар салдарынан Ресей экономикасы биыл 3,8 пайызға, ал келер жылы тағы 0,6 пайызға қысқарады. ХВҚ болжамы бойынша, 2016 жылы мұнай баррелінің бағасы 52 доллардан 55 долларға дейін өсуі мүмкін.