Алматының Медеу аудандық 2-соты журналист, "Трибуна. Саяси Қалам" газеті бас редакторының міндетін атқарушы Жанболат Мамайды қамауда ұстау мерзімін 10 маусымға дейін созды.
Сотқа Мамайдың ата-анасын ғана кіргізді, бірақ журналистерді және Мамайды қолдап келген белсенділерді жіберген жоқ.
Соттың кіреберісіндегі күзетшілер залға журналист Рысбек Сәрсенбай мен белсенді Асхат Берсәлімовті ғана жіберді. Күзетшілер сотқа журналистер мен басқа қолдаушыларды не үшін кіргізбейтіндерін түсіндірмеді. Жанболат Мамайдың адвокаты Жанар Балғабаева сот отырысы арасында сыртқа шығып, тыңдаудың жабық өтіп жатқанын айтты.
Оппозициялық "Трибуна. Саяси қалам" газетінің редакторы міндетін атқарушы 28 жастағы Жанболат Мамайды бұрынғы банкир Мұхтар Әблязовтің ұйымдастыруымен "БТА Банктен" ұрланған ақшаның бір бөлігінің ізін "Трибуна. Саяси қалам" газеті арқылы қаржылық операциялар жасап жасырған" деген күдікпен тергеп жатыр.
Ақпанның 11-інде сот шешімімен екі айға қамалған Мамай өзіне тағылған айыпты мойындамайды. 2009 жылдан бері Еуропада жүрген оппозициялық саясаткер Мұхтар Әблязов айыптауды "абсурд" деп атап, Мамаймен ешқашан кездеспегенін мәлімдеген.
Наурыздың 31-і күні Медеу аудандық соты Мамайды 10 мамырға дейін қамауда қалдырған.