Үндістан билігі елдің қаржы орталығы саналатын Мумбай қаласында алты қабатты ғимарат опырылып қирап, 11 адам қаза тапқанын хабарлады. Қирандылар астында тағы 20 адам қалып қойған болуы мүмкін деген қауіп бар.
Мумбайдың халық тығыз қоныстанған ауданында қираған ғимаратты құтқарушылар арнайы техникамен аршып жатыр. Полиция 14 адам құтқарылып, ауруханаға жатқызылғанын хабарлады.
Жергілікті биліктің болжамынша, нөсер 100 жылдай уақыт бұрын салынған ғимараттың іргетасына әсер еткен болуы мүмкін.
Мумбайда өткен айдан бері осымен үшінші ғимарат опырылып қирап отыр.
Үндістанда жыл сайын құрылыс талаптарының сақталмауы мен ескілерінің тозығы жетуінен бірнеше ғимарат құлап, ондаған адам қаза табады.