Бүгін Байқоңыр ғарыш айлағынан ұшуы жоспарланған "Союз-2.1а" зымыран тасығышы ұшпай қалды.
Бұл туралы "Роскосмос" корпорациясы өзінің ресми сайтында хабарлады. "Прогрес МС-08" жүк кораблін ғарышқа алып ұшпақ зымыран тасығыштың ендігі ұшу уақыты 13 ақпанға шегерілді.
Мұның алдында зымыран тасығышты құрастыру 8 ақпанда сәтті аяқталғаны хабарланған. Сонда мемлекеттік комиссия мен техникалық басшылық өкілдерінің жиынында зымырандық кешенді 9 ақпанда старт алаңына қондыру келісіліп, зымыран тасығыш пен зымыран №31 ұшу алаңына қойылған болатын.
Зымыран халықаралық ғарыш станциясындағы экипажға 890 килограмм жанар май, 69 килограмм сығымдалған газ, 420 килограмм су және ғылыми құралдар, азық-түлік, киім-кешек, дәрі-дәрмек және жеке гигиеналық заттарды тасып апарады.
Зымыранның бүгін ұшпай қалу себебі ретінде қозғалтқыштардың автоматты түрде өшіп қалғаны айтылған. Бұл - Байқоңырдан биыл ұшатын алғашқы зымыран болмақшы.