Шымкенттік белсенді Сүйін Абулда белсенді Ардақ Әшімді Facebook әлеуметтік желісі арқылы "қадыр-қасиетім мен ар-намысыма тиді" деп сотқа берді. 2 наурызда Шымкенттің Әл-Фараби аудандық соты Сүйін Абулданың арызын қарай бастады. Сотқа судья Еркін Оспанов төрағалық жасайды.
Сүйін Абулданың айтуынша, Ардақ Әшім Facebook-те өзін "Марал Құрылтай" және "Қазақ қаны қазақ" атты аккаунттар ашып, тапсырыспен жұмыс істейтіні" туралы жазған.
Сүйін Абулда, шымкенттік белсенді.
- Ардақ Әшім осы жазбасы арқылы қадыр-қасиетіме, ар-намысыма тиіп отыр. Егер жазбасын дәлелдей алмаса, жазасын алсын, - деді ол сотта.
Ардақ Әшім тағылған айыппен келіспейтінін, өз сөзін "Марал Құрылтай" және "Қазақ қаны қазақ" аккаунттарының IP адрестері дәлелдейтінін айты.
- Прокуратураға өтініш білдірдік. Олар аккаунттардың түпкі иесін анықтап береді, - деді ол.
Сот белсенді Сүйін Абулданың бір миллион теңге моральдық шығын өндіру туралы арызын өндіріске қабылдап, Қылмыстық кодекстің 130-бабы ("жала жабу") және 131-бабы ("қорлау") бойынша қарауға алған.