Трамп әкімшілігі АҚШ пен Мексика шекарасында отбасынан ажырап қалған 1800-ден астам баланың ата-анасымен қосылғанын хабарлады.
АҚШ мигрант отбасылардың балаларын 2018 жылдың көктеміндегі "шекара бұзғандарды жазалайтын ережеден" кейін алып қойған. Кейін Трамп бұл ережені жойған.
АҚШ билігі 2500 баланы шілденің 25-не дейін ата-аналарына қайтаруы тиіс болған. 26 шілдеде Трамп әкімшілігі "1820 бала ата-анасымен қосылды" деп мәлімдеді. Тағы 378 баланы туысқандары қамқорлығына алған. 700 бала ата-анасынан ажыратылған күйі қалды. Олардың төрт жүзден астамының ата-анасы депортацияланған.
Вашингтон "нөлдік төзімділік" саясатын ұстанғалы 2500 баланы отбасынан ажыратты. Олардың жүзден астамы - төртке толмаған. АҚШ-тың жаңа иммиграция заңына сәйкес, шекараны заңсыз өткендер қылмыстық жауапкершілікке тартылады.