13 қыркүйекте Арыс қаласында әскери қойма аумағын тазарту кезінде оқ-дәрі бөлшектері жарылып, төрт әскери жарақаттанды. Олар әскери ұшақпен Алматыдағы әскери госпитальға жеткізілген. Бұл туралы қорғаныс министрлігі хабарлады. Жараланған әскерилердің халі қалай екенін ведомство жазбаған.
Министрлік әскери полиция оқиғадан соң тексеріс бастағанын хабарлады. Ведомство мәлімдемесінде "Арыс тұрғындарына қауіп жоқ. Жағдай бақылауда" деп жазылған.
Қорғаныс министрлігінің хабарына қарағанда, Арыс пен қойма маңындағы нысандарды тазартқан соң оқ-дәрінің басым бөлігі әскери бөлімше аумағына жиналған. "Бірақ оқ-дәрі бөлшектерін толық жинау мен оларды залалсыздандыруға біршама уақыт керек" дейді ведомство.
Арысты атылған оқ-дәріден тазарту кезінде жарылыс болуы алғаш емес. 5 шілдеде қаладағы әскери қоймада "қалып қалған 1-2 снаряд жарылып, артынша өрт шыққан". Қорғаныс министрлігі "зардап шеккендер жоқ" деп хабарлаған.
24 маусымда Түркістан облысы Арыс қаласындағы әскери қойма жарылды. Жарылыстан төрт адам қаза тапқан. Ресми дерек бойынша, қоймадағы оқ-дәрінің 70 пайыздан астамы жарылып кеткен. Қаладағы тұрғын үйлердің басым бөлігі бүлінген.
Екі айдан соң, тамызда қаладағы әскери бөлімнің командирі мен оның орынбасары қамауға алынды. Оларға Қылмыстық кодекстің "Қару-жарақпен, сондай-ақ айналадағыларға қауiп төндіретін заттармен және нәрселермен жұмыс істеу қағидаларын бұзу" және "Қызметке салғырт қарау" баптарымен күдікке ілінген. Арыс соты оларды екі айға қамауға алған.
Жарылыс күні Арыс қаласынан 40 мыңнан астам адам жақын маңдағы елдімекендерге қашты. 27 маусымда Шымкентте шеруге шыққан жүздеген арыстық соңғы он жыл ішінде төрт рет жарылыс болған Арыс қаласына бармайтынын айтып, биліктен өздерін басқа жаққа көшіруді талап еткен. 28 маусымда Шымкент пен көрші елді мекендерді уақытша паналаған арыстықтар үйлеріне оралды. Билік Арыстағы әр тұрғынға 100 мың теңге беретінін айтқан.
Қазақстан үкіметінің дерегінше, Арыс қаласын қалпына келтіруге 56,1 миллиард теңге қажет. Түркістан облыстық әкімдігі қыркүйекте қалада 8600-ден астам тұрғын үй барын, 7 000-нан астам тұрғын және көпқабатты үйлерде құрылыс жұмыстары аяқталғанын хабарлаған еді. Тұрғындардың кейбірінің жөндеу жұмыстарына көңілі толмайды.
Соңғы он жылда Арыс қаласында әскери оқ-дәрі сақталатын қоймалар мен оларды жоюға арналған жерде төрт рет жарылыс болып, бірнеше адам қазаға ұшыраған. Биыл маусымдағы жарылыстан кейін қорғаныс министрлігі әскери оқ-дәрінің "елдімекендерден аулақ жерге" көшірілетінін мәлімдеген.
Арыс қаласында 45 мыңға жуық адам тұрады.
Әскери қойма: Жарылысқа дейін және кейін