Ресейдің Хабаровск қаласында 12 қыркүйекте аймақтың бұрынғы басшысы Сергей Фургалды қолдау акциясы өтті деп хабарлайды Азаттықтың Орыс қызметі. Фургал "15 жыл бұрын кәсіпкерді тапсырыспен өлтіруді ұйымдастарған" деген айыппен қазір Мәскеуде қамауда отыр.
Жергілікті басылымдар сенбідегі шеруге екі мыңға жуық адам қатысты деп хабарлады. Қала билігі акцияға шыққандар саны 700-ден көп емес дейді. Наразылық шеруіне шыққандар Фургалдың ісі Хабаровск аймағында "алқабилер сотында әділ қаралсын" деп бұрынғы талаптарын тағы қайталады. Акция жергілікті биліктің оны ұйымдастырушыларға рұқсат беруден бас тартқанына қарамастан өтті.
В России — выборы, в Хабаровске — митинг!Вчера регионы начали трёхдневную операцию по удалению единороссов из власти с помощью Умного голосования (https://t.co/H9cQdnpkx8).Поддержат ли хабаровчане это благое дело? Узнаем вместе с вами в прямом эфире: https://t.co/Gpe8PEhqha pic.twitter.com/PuiZb6E311
— Штаб Навального в Хабаровске (@teamnavalnykhv) September 11, 2020
Қала билігі 11 шілдеден бері наразылық акциялары барысында 4131 әкімшілік құқық бұзу фактісі тіркеліп, 178 әкімшілік хаттама толтырылғанын хабарлады. Сотта 160 іс қаралып, 23 адам тұтқындалған.
12 қыркүйекте өткен наразылық акциясына қатысушылар жергілікті билікке сенбейтінін мәлімдеді. Олардың қолында "Менің таңдауым – Фургал", "Фургалға бостандық!", "МЕН/БІЗ Сергей Фургал!" деген жазу болды. Демонстранттар шеру тартып жүріп өткен көшелерде автокөлік қозғалысы тоқтады. Бірақ бүгінгі акция барысында полиция ешкімді ұстаған жоқ.
Ресейдің Хабаровск өлкесінің губернаторы Сергей Фургал биыл 9 шілде күні қамауға алынған. Одан бөлек тағы төрт адам тұтқындалған. Тергеу комитеті бұлардың кәсіпкерлер Евгений Зоря мен Олег Булатовты өлтіруге, ал 2004 жылы бизнесмен Александр Смольскийге жасалған қастандыққа қатысы бар деп санайды.
Фургал қамауға алынғаннан кейін Хабаровск өлкесі мен өзге де аймақтарда жаппай наразылық митингілері мен пикеттер басталған. 20 шілде күні Мәскеу Михаил Дегтяревті Хабаровск өлкесі басшысының міндетін уақытша атқарушы етіп тағайындағаннан кейін демонстранттардың бұрынғы талаптарына Ресей президенті Владимир Путин отставкаға кетсін деген талап қосылды.