Қазақстанның бас санитар дәрігері Ерлан Қиясов вирус қатты күшейген аймақты "қанық қызыл" етіп белгілеу жөнінде қаулы шығарды.
Осыған байланысты "қанық қызыл" аймақтағы Ashyq жүйесімен жұмыс істейтін кәсіптік субьектілер 2 тамыздан бастап демалыс күндері жұмыс істемейтін болады.
9 тамыздан кейін "қанық қызыл" аймақтағы Ashyq жүйесін қолданатын нысандарға түнгі 00.00-ге дейін жұмыс істеуге рұқсат етіледі.
Осыған дейін аймақтар вирустың таралуына байланысты қызыл, сары және жасыл аймақ деп бөлінген. Қазір Түркістан облысынан басқа өңірлер "қызыл" аймақта. Нұр-Сұлтанда инфекциялық ауруханаларда науқастар 70 пайыздан асқан.
Сонымен бірге бас санитар дәрігердің жаңа қаулысына сәйкес, Алматы, Атырау, Шымкент және Қарағандыда 2 тамыздан бастап Ashyq жүйесін қолданбайтын барлық мекемелердің қызметі тоқтайды. Бұл тізімге мемлекеттік мекемелер, құқық қорғау органдары, денсаулық сақтау мекемелері, БАҚ, азық-түлік дүкендері мен дәріханалар кірмейді.
Осыған дейін Қазақстанның қоғамдық тамақтану қауымдастығы президент Қасым-Жомарт Тоқаевтың атына ашық хат жазған. Олар егер жұмыс уақытын қысқартатын болсақ, табыс 70–80 процентке дейін түсіп, 30 проценттен астам қоғамдық тамақтану орындары жабылуы мүмкін деп алаңдаушылық білдірген.
ОҚИ ОТЫРЫҢЫЗ Карантиннің күшеюіне наразы рестораторлар шығынға бататынын айтады