Ұлыбритания Ресей мен Беларуське жаңа санкция салды. Жалпы құны 1,7 миллиард фунт-стерлинг (2,1 миллиард АҚШ доллары) болатын сауда айналымына шек қойылды. Бұл жөнінде британ үкіметі баспасөз қызметі хабарлады.
Британдықтар есебі бойынша, Ресей Украинаға басып кіргелі Борис Джонсон үкіметі мөлшері 5 миллиард доллар болатын тауардың әрі-бері тасымалдануына шек қойған.
Ресейден импортталатын 1,4 миллиард фунт-стрелинг (1,7 миллиард доллар) болатын тауардың тарифі 35 пайызға өседі. Бұған қоса платина мен паладийдің кедендік бажы артады.
"Ресей – платина мен паладий өндіру бойынша әлемдегі жетекші елдердің бірі, сондықтан ол платина мен паладий өнімдерін экспорттау бойынша Ұлыбританияға қатты тәуелді" делінген Британия үкіметінің түсіндірмесінде.
"[Ресей президенті Владимир] Путиннің Украинаға қатысты жоспарына тосқауыл қойып, украин халқына қарсы варварлық әрекеттер жасалған заңсыз шабуылды тоқтату үшін қолдан келгеннің бәрін жасауға ниеттіміз. Ұзаққа кететін санкциялардың бұл жолғы легі Ресейдің әскери машинасына қосымша соққы болмақ" деді Британияның халықаралық сауда министрі Энн-Мари Тревельян.
Бұған қоса, Лондон экспортқа да шектеу қойды. 200 миллион фунт-стрелинг шамасындағы британ тауарын Ресейге экспорттауға тыйым салынды. Бұл тізімде әсіресе Ресейде қат химикат, пластмасса, резина, машина құрылғылары сияқты тауарлар бар.
Бұл – Британияның Ресейге қатысты экспорт-импорт шектеуінің үшінші легі. Осыдан кейін санкцияға іліккен Ресей импортының көлемі 96 пайызға, Ресейге Британия экспортының көлемі 60 пайызға жетпек.
Наурыздың ортасында Лондон Ресейге қымбат заттарды экспорттауға тыйым салған және Ресейдің кей тауарларына, соның ішінде араққа тарифті арттырған. Сәуірдің соңында украин халқына қарсы қолданылуы мүмкін деген тауарларды экспорттауға шек қойылды.
ОҚИ ОТЫРЫҢЫЗ
Ұлыбритания Украинаға тағы 1,6 млрд доллар көлемінде әскери көмек бередіБритания қорғаныс министрлігі: Ресейге әскери шығынын қалпына келтіру үшін жылдар керекБритан министрі: Путин 9 мамырда мобилизация жариялауы мүмкін