Freedom House халықаралық құқық қорғау ұйымы Қазақстан билігін оппозициялық белсенді Жанболат Мамайды босатуға үндеді.
"Freedom House Жанболат Мамайға қаңтардағы наразылыққа қатысты жаңа айып тағылғанына алаңдайды. Бұл Қазақстан үкіметінің елдегі адам құқығын сақтайтын "Жаңа Қазақстан" туралы ұстанымына берік екеніне күмән келтіреді" деп жазды Freedom House twitter-дегі парақшасына.
Freedom House мәліметінше, Жанболат Мамай 8 маусымда үндеу жариялап, өзінге тергеу органдары жаңадан тағып отырған "жаппай тәртіпсіздікті ұйымдастырды" және "жалған ақпарат таратты" деген айыптарды мойындамайтынын мәлімдеген. Ол өзін билік саяси астармен қудалап жатыр деп есептейді.
8 маусымда белсендінің әйелі Инга Иманбай Facebook’тегі парақшасына Жанболат Мамайдың тергеу изоляторынан жазған хатын жариялаған. Онда Мамай өзіне тағы екі бап бойынша айып тағылғанын хабарлаған.
"Айыпты деп танылса Мамай 10 жылға бостандығынан айырылуы мүмкін. Freedom House Мамайды тезірек босатып, оған тағылған айыптарды алып тастауға үндейді" делінген Freedom House мәлімдемесінде.
Тіркелмеген "Демократиялық партия" жетекшісі, 34 жастағы Жанболат Мамай биылғы 26 ақпаннан бері қамауда жатыр. 6 мамырда сот оның қамау мерзімін 12 маусымға дейін ұзартқан. Белсендінің жақтастары бұл істердің саяси астары бар деп санайды.
Осыған дейін Human Rights Watch, Amnesty International халықаралық ұйымдары Қазақстан билігін Жанболат Мамайды босатып, тағылған айыптарды алып тастауға үндеген.
Мамай авторитар үкіметті қатаң сынаумен танылған. Ол "Қазақстанның демократиялық партиясын" құрып, тіркеуге тырысқанын, бірақ билік кедергі келтіргенін айтқан.
ОҚИ ОТЫРЫҢЫЗ
Қамаудағы Жанболат Мамай Қаңтар оқиғасы бойынша куәгерден күдіктіге айналды. Оған тағы екі айып тағылдыЖанболат Мамайды босатуды талап етіп, плакат ілген "демпартия" белсенділеріне айыппұл салындыҚаңтар шындығын ашу, саяси қудалауды доғару. Прагадағы қазақтар Ақордаға бірнеше талап қойды Әділет вице-министрі "Партия тіркегісі келетін топтар құжаттарын толықтырып қайта әкелсе болатынын" айтады"Сталин қылмыстары: Ұлттық элитаны қалай жойды". Қамаудағы Жанболат Мамайдың фильмі көрсетілді