Келесі президент Конституциядағы президент мерзімі туралы норманы өзгерте алмайды. 16 қыркүйекте журналистердің сұрақтарына жауап берген әділет министрі Қанат Мусин осылай деп мәлімдеді.
"Бүгін Конституцияға президент мерзімін жеті жылға созу және президент бір ғана мерзімге сайлана алады деген нормалар қабылданды. Бұл баптар өзгеріссіз қалады. Яғни, келесі президент те, парламент те бұл нормаларды өзгерте алмайды" деді парламенттің бірлескен отырысынан кейін ақпарат құралдарының сұрақтарына жауап берген Қанат Мусин.
Дегенмен ол Қазақстан заңнамасында Конституцияны өзгертуге байланысты қандай да бір шектеулер жазылмағанын атап өтті.
"Конституцияның өзінде неше рет өзгертуге болады, қашан өзгертуге болады. Мұндай нормалар жоқ. Бұл қоғам дамуына қатысты ғой" деді ол.
16 қыркүйекте парламент Конституцияға енгізілетін бірқатар өзгерістер атап айтқанда, президент мерзімін жеті жылға созуды, Астана атауын қайтаруды және конституциялық сот судьяларының өкілет мерзімін 8 жылға ұлғайтуды мақұлдаған. Құжат енді президентке қол қоюға жіберіледі.
Қарай отырыңыз: "Конституция өзгермейді" деп уәде берген Тоқаев негізгі заңға бір жылда екі рет өзгеріс ұсынды (6 қыркүйек 2022 жыл).
Your browser doesn’t support HTML5
"Конституция өзгермейді" деп уәде берген Тоқаев негізгі заңға бір жылда екі рет өзгеріс ұсынды
Сарапшылар Қазақстан Конституциясына жиі өзгеріс енгізілетінін сынап, оның "шимай дәптерге" айналғанын айтқан. Кейбір тарихшылар Тәуелсіздік алғалы бері Конституцияға 1100 өзгеріс енгізілгенін алға тартады. Соңғы рет 5 маусым күнгі референдум нәтижесінде Конституцияның 33 бабы өзгеріп, 50-ден астам түзету енгізілген.