Түркия сыртқы істер министрлігі Швецияда демонстранттардың мұсылмандар киелі санайтын Құран кітабын өртегенін айыптады.
Сенбі күні ультраоңшыл Hard Line партиясының өкілі Расмус Палудан Түркияның Швециядағы елшілігі алдында Құран өртеген. Reuters'дің жазуынша, билік рұқсат еткен акция кезінде жиналғандар Түркия билігінің Швециядағы сөз еркіндігін шектеу талпыныстарына қарсы шыққан.
Осыдан кейін швед қорғаныс министрінің Анкараға сапары кейінге қалдырылды, Түркия билігі Стокгольмді келісімді бұзды деп айыптады.
Стокгольмде Құранның өртелгенін көптеген мұсылман елдері айыптады. Арасында Сауд Арабия, Иордания, Кувейт бар. Түркияда наразылық акциялары өтіп, жиналғандар швед туын өртеді. Түркия СІМ мәлімдеме таратып, Құран өртеуді дінге жасалған шабуыл деп бағалады. Түркия қорғаныс министрі Хулуси Акар Швециядағы наразылыққа байланысты Швеция қорғаныс министрі Пол Йонсонның келесі аптаға жоспарланған Түркияға сапары кейінге шегерілгенін мәлімдеді. Түркия сонымен бірге Швецияны НАТО-ға қосылу бойынша бұрын жасалған келісімдердің бәрін бұзды деп кінәлады.
Швеция сыртқы істер министрі Тобиас Билльстрем елде сөз еркіндігі бар, бірақ бұл Швеция билігінің оның барлық көрінісін қолдай береді дегенді білдірмейді деп мәлімдеді.
Islamophobic provocations are appalling. Sweden has a far-reaching freedom of expression, but it does not imply that the Swedish Government, or myself, support the opinions expressed.
— Tobias Billström (@TobiasBillstrom) January 21, 2023
- Ресей Украинаға басып кіргеннен кейін бұрын бейтараптық ұстанған Швеция мен Финляндия НАТО-ға кіруге өтініш берген. Ереже бойынша НАТО-ға мүше елдердің барлығы өтініш бергендерді қолдаған кезде ғана әскери одаққа жаңа ел мүше бола алады. Түркия Швецияға бірқатар талап қойған. Арасында күрдтердің ұйымдарын террористік ұйым деп тану, Анкараға қару-жарақ беруге салынған тыйымды жою, Түркияға бірқатар күрд белсенділерін беру туралы талаптар бар.