Қазақстан мен Қытай БҰҰ Бас Ассамблеясында Ресейдің Украинаға басқыншылығын сынайтын тұсы бар қарарды жақтап дауыс берді. Бұған дейін Қазақстан мен Қытай мұндай құжатқа дауыс бергенде қалыс қалып келген еді.
Дауыс беру 26 сәуірде өткен. "БҰҰ мен Еуропа кеңесінің серіктестігі" туралы қарарды 122 ел қолдаған. Олардың қатарында Ресейдің серіктесі деп есептелетін Армения, Бразилия және Үндістан да бар.
Резолюцияда "Ресейдің Украинаға басқыншылық жасағаны", "бұған дейін Грузияға агрессия көрсеткені", "Ресейдің құрбандарға шығынды өтеу міндеті" жайлы айтылады.
Қазір Еуропа алдында тұрған теңдессіз сын-қатер [...] БҰҰ мен Еуропа кеңесі арасындағы ынтымақтастықты нығайтуды талап етеді, әсіресе бұл кез келген мемлекеттің егемендігін, аумақтық тұтастығы мен саяси тәуелсіздігін құрметтей отыра, бейбітшілік пен қауіпсіздікті жедел қалпына келтіру үшін, соғыс қимылдары кезінде адам құқықтары мен халықаралық гуманитарлық құқықтың сақталуын қамтамасыз ету үшін, құрбандарға келген зиянды өтеу үшін және халықаралық құқықты бұзғандардың бәрін жауапқа тарту үшін керек" деп жазылған қарар кіріспесінің 9-параграфында.
Today #UNGA77 adopted resolution on "Cooperation between @UN and the @coe" with 1⃣2⃣2⃣ votes. We thank our co-facilitators @irishmissionun and UN members for their support 🙏 pic.twitter.com/AL1NBpSRin
— Iceland at UN 🇮🇸 (@IcelandUN) April 26, 2023
Құжатқа Ресей, Беларусь, Солтүстік Корея, Никарагуа және Сирия қарсы дауыс берді. Қырғызстан, Тәжікстан мен Өзбекстан қалыс қалған елдердің қатарында. Ресейдің БҰҰ-дағы өкілі қарарды "айыптауы басым саясиландырылған құжат" деп сынады.
- Еуропа кеңесі – Еуропа одағының құрылымына кірмейтін халықаралық ұйым. Мақсаты – құрамына енетін 46 елде адам құқығын қорғау, демократияны, заң үстемдігін және мәдени байланыстарды нығайту.
- Астана Ресейдің Украинаға басқыншылығына байланысты бейтарап позиция ұстанып отыр. Қазақстан билігі Ресейдің Украинаға соғыс ашуын айыптаған жоқ, бірақ Украинаның аумақтық тұтастығын құрметтейтінін мәлімдеген.
- Қазақстан осыған дейін Ресейдің Украинаға ашқан соғысын сынайтын қарарлардың көбінде қалыс қалып келген. Ал Ресейден Украина аумағынан әскер шығаруды, агрессияны тоқтатуды талап еткен қарарға қарсы дауыс берген.