Израиль әскері ірі құрлық операциясын бастамас бұрын Газа секторындағы радикалды ХАМАС тобының нысандарына соққыны үдетеді. Бұл жөнінде Израиль қорғаныс армиясының баспасөз хатшысы Даниэль Хагари мәлімдеді. Ол Газаның солтүстік аудандарындағы тұрғындарды қауіпсіз жерге көшуге тағы үндеп, ХАМАС тұрғын үйлерді өз операцияларына пайдаланып жатқанын айтты.
"Соққы жасалған Газадағы әрбір ғимаратты ХАМАС пайдаланған" деді ол. Оның айтуынша, соққы ғимараттарды қирату үшін жасалмайды.
ЦАХАЛ өкілі құрлық операциясының мерзімі туралы айтпады. Бұған дейін оның мерзімі ХАМАС ұстап отырған адамдарды кепілден босату бойынша келіссөзге уақыт қалдыру үшін АҚШ өтінішімен кері шегерілген.
21 қазанда кешке ХАМАС өкілдері тағы екі адамды кепілдіктен босатқысы келгенін айтқан, алайда Израиль мұны терістеді. Аталған топтың нені талап еткені айтылмайды.
Жақында АҚШ-тың екі азаматы босатылған. Жалпы кепілдіктегі адамдар 200-ден асады деп айтылады.
Жиһадшылардың Израильге шабуылының салдарынан 1400-ден астам адам өлген. Газа секторында, Палестина жағының дерегінше, құрбан болғандар саны 4000-нан асқан. Шамамен 200 адамды ХАМАС тобы кепілдікте ұстап отырғаны айтылады. Палестина жағы Израильді азаматтық нысандарға соққы жасады деп айыптайды.
Израиль әскерінің айтуынша, Газа тұрғындары палестиналық радикалды топтардың Израильге қарай ұшырған алайда нысынаға жете алмаған ракеталарынан да қаза болып жатыр. Сондай жайттардың бірі – Әл-Әхли ауруханасы аумағындағы жарылыс. АҚШ барлау қызметінің дерегінше, жарылыстан 100-300 адам қаза болуы мүмкін. Көптеген видеоларды сараптаған Associated Press агенттігі ауруханадағы жарылысқа "Исламдық жиһад" тобы жіберген ракетаның құлауы түрткі болды деген қорытындыға келген. ХАМАС, Палестина автономиясының билігі және бірқатар Таяу Шығыс елдері шабуылға Израильді айыптаған.
Қазір Израиль әскері Газа аумағын атқылап жатқанмен қарқыны сәл бәсеңдеген. 21 қазанда Израиль-Ливан шекарасында атыс жалғасты. Израиль әскері ираншыл "Хезболла" тобының нысандарына соққы жасап жатыр. Өз кезегінде олар да Израиль аумағын атқылап жатыр.
Бірқатар елдерде оның ішінде, Батыс Еуропада сенбі күні палестиналықтарды қолдау шарасы өтті. Олар атысты тоқтатуды талап етіп, Газа тұрғындарына қолдау білдірді. Лондондағы демонстрацияға 100 мыңға жуық адам қатысқан.
Thousands of demonstrators gathered in the capital to demand an end to Israeli airstrikes on Gaza, in the wake of the 7 October surprise terror attack by Hamas.Read more: https://t.co/gp11Gtooat pic.twitter.com/AFSXm7iY8t
— Sky News (@SkyNews) October 21, 2023
Сенбі күні Каирде БҰҰ бас хатшысы, араб елдерінің өкілдері мен аймақтың өзге елдерінің басшылары, бұған қоса ЕО, Ресей, Қытай өкілдері қатысқан халықаралық кездесу өтті. Қандай бір шешім қабылданғаны айтылмады.