13 желтоқсанда Ресей тергеушілері АЕ/АР-ның Татар-Башқұрт қызметінің тілшісі, Америка журналисі Алсу Құрмашеваға қарсы тағы бір қылмыстық іс ашты. Ол биыл қазан ортасында Қазан қаласында негізсіз ұсталған.
"Шетел агенті" мәртебесімен байланысты жалған айыптаудан кейін Құрмашеваға Қылмыстық кодекстің соғыс туралы ақпарат тарату туралы бабына сәйкес айып тағылған. 11 желтоқсанда журналистің "Нет войне" кітабына байланысты оның үстінен "Ресей армиясы туралы жалған ақпарат тарату" бабы бойынша үшінші қылмыстық іс қозғалды. Екі бап бойынша кінәлі деп танылса Құрмашева 15 жыл түрмге кесілуі мүмкін.
"Алсуға қосымша айып тағу туралы Ресей билігінің шешімін кесімді түрде айыптаймыз" деді АЕ/АР медиакорпорациясының президенті міндетін атқарушы Джеффри Гедмин.
"Журналистика қылмыс емес. Бұл қатігез қудалауды доғару керек" деді ол.
Алсу Құрмашева отбасынан жырақ жерде әділетсіз қамауда отырғанына сегіз апта болды.
Алсу Құрмашева күйеуі және екі кішкентай қызымен Прагада тұрады. Ол қарт анасына көмектесу үшін Ресейге биыл мамыр айында барған. Маусым басында Прагаға ұшар кезде Ресей билігі одан төлқұжатын тартып алып, Қазаннан ұшуына рұқсат бермеген. Содан бері оның үстінен үш қылмыстық іс қозғалды.
- Журналистің ұсталуын Канада, Чехия, Франция, Польша және Швеция, сонымен бірге ЕО-ның сыртқы істер және саяси қауіпсіздік жөніндегі жоғарғы өкілі, Еуропа парламентінің президенті, ЕҚЫҰ, БҰҰ Адам құқығы жөніндегі Жоғарғы комиссары айыптады. Еуропа кеңесінің журналистерді қорғау жөніндегі платформасы Алсу Құрмашеваны босатуға шақырған.
- Amnesty International, "Журналистерді қорғау комитеті", Freedom House, ПЕН-Америка, "Шекарасыз тілшілер", "Журналистердің халықаралық федерациясы" да журналистің ұсталуын айыптады.
- "Саяси тұтқындарды қолдау. Мемориал" жобасы Алсу Құрмашеваны саяси тұтқын деп таныды.
- "Шекарасыз тілшілер", "Журналистикадағы әйелдер коалициясы", "Ұлттық баспасөз клубы", "Журналистерді қорғау комитеті" және тағы оннан астам ұйым АҚШ мемлекеттік хатшысы Энтони Блинкенге қайырылып, Құрмашеваны "заңсыз ұсталған" журналист деп тануға үндеді. Вашингтон заңсыз ұсталған Америка азаматтарын шетел мемлекетінен оны босатуға ресми түрде күш салады.