Украина әскері F-16 әскери ұшақтарын алды. Бұл жөнінде дереккөзге сүйенген Bloomberg агенттігі хабарлады. Егер ақпарат расталса, бұл Украинаға жеткізілген алғашқы америкалық жойғыш ұшақтар болмақ.
Украина әскері ұшақтарды соғыста бірден қолдана ала ма, жоқ па, ол жағы белгісіз деп жазды басылым.
Киев Bloomberg ақпаратына түсініктеме бермеді.
Ресей Украинаға басып кіргелі бері Киев батыс елдерінен жойғыш ұшақтарды сұрап келеді.
2023 жылы бірнеше ел АҚШ-тың келісімімен Киевке осындай ұшақ түрін беру жөнінде шешім қабылдаған.
Биыл көктемде The New York Times басылымы Украина алты F-16 ұшағын шілде айында алуы мүмкін екенін, 12 украин ұшқышы арнайы дайындықтан өткенін жазған. Одан бөлек, жойғыш ұшақтарды жөндейтін шамамен 50 украин маманы арнайы дайындықтан өткен.
General Dynamics F-16 өткен ғасырдың 70 жылдарынан бері шығарылып келе жатқан төртінші буынға жататын жойғыш ұшақтардың бірі. Ол әуедегі нысандарды атқылай алады, одан бөлек құрлықтағы нысандарға да соққы жасай алады. Ол 20-дан астам елдің қарулы күштерінде бар. 2023 жылғы мәлімет бойынша, әлем елдерінде осындай 2100 жойғыш ұшақ болған.