12 қарашада кешке Жаңаөзенде "Өзенмұнайгазға" қарасты "Бұрғылау жұмыстары басқармасы"(БЖБ) компаниясының жұмысшылары жұмысты тоқтатып, ереуілге шықты. Бұл жөнінде мекеме жұмысшылары хабарлады.
Олар басшылыққа бес түрлі талап қойып отыр: ӨМГ зейнеткерлері мен денсаулығынан айырылған мұнайшылардың балаларын тікелей штатқа алу, Жаңаөзен қаласында жұмыссыздық мәселесін шешу, Ұжымдық шартта 2013 дейін болған дербес еңбекақы төлеу жүйесін қайтару, машинистер мен операторлардың дәрежесін көтеру, 30% қосымша жалақы тәртібін төлеуді ұжымдық шартқа енгізу.
"Егер біз дербес еңбекақы төлеу жүйесіне өтсек, жалақымыз өседі. Мысалы бізден табыс салығын және өзге де салық түрлерін айлығымыздан ұстайды. Соны менің түсінігім бойынша, жаңа жүйеге өтсек, бізден ұстамайды. Бізден ұсталған салық біздің зейнетақы жүйесіне құйылады" дейді наразылыққа шыққан жұмысшылардың бірі Ғазиз Махамбетов Азаттық тілшісіне.
Оның сөзінше, 13 қарашада "Өзенмұнайгазға" қарасты тағы үш мекеме БЖБ-ның талаптарын қолдап, жұмысқа шықпаған. Азаттық әзірге ол компаниялардың жқұмысшыларынан пікір ала алмады.
Сәрсенбі күні тараған видеолардың бірінде ӨМГ-ға қарасты мекеме жұмысшысы делінген бір адам "БЖБ талаптарын қолдап, бір сағатқа жұмысты тоқтаттық" деп айтады. Видеода жұмысшылардың ғимарат ішінде тұрғаны көрінеді.
"БЖБ-ның басында бар мәселе оларда да бар. 32, 33, 35-мекемелер жұмысқа шықпапты. Мен өзім бүгін бір мекемеге барып келдім. Олар жүз пайыз шықпай тұрмыз деді" Ғазиз Махамбетов.
Оның айтынша, бір күн бұрын кешке БЖБ мекемесінің ереуілшілеріне "Өзенмұнайгаздың" бас директоры, кадр бөлімінің жетекшісі, бас экономист келген. Олар жұмысшыларға "талаптарың заңсыз"деп айтқан.
"Біз бұл талапты айтып келе жатқанымызға жеті ай болды, осы уақыт аралығында ештеңе өзгермеді. Бұған дейін біздің жігіттер тіпті Астанаға дейін барып, "ҚазМұнайгазға" жазбаша арызымызды тапсырып келген. ҚМГ-ның жаңа басшысы бұл талап дұрыс екенін айтқан" дейді Ғазиз Махамбетов.
13 қарашада Азаттық "Бұрғылау жұмыстары басқармасы" мекемесіне хабарласқанмен әзірге жауап ала алмады. Мекеменің директоры міндетін атқарушы Меңдібай Қосжанов журналистердің сұрақтарына жауап бермейтінін айтып, телефон тұтқасын қоя салды.
2011 жылғы мұнайшылар ереуілінен кейін құрылған "Бұрғылау жұмыстары басқармасы" компаниясында жұмысшылардың сөзінше, мың шақты адам істейді.