Шілденің 8-9-ы күндері Астанадағы «Қазақстан» орталық концерт залында «Ел, Елбасы, Астана» деген атпен ақындар айтысы өтті.
Айтыстың алғашқы күні 10 жұп (20 ақын) сөз сайыстырды. Алматы атынан айтысқа қатысқан Бақыт Жағыпарұлы мен Фархат Маратұлы қоғамдағы кейбір келеңсіздіктерді айтты.
«Халыққа бағытталған кейбір істер елбасын алдауға жасалатынын» сөз еткен Бақыт Жағыпарұлы елдегі көзбояушылық туралы былай деді:
– Президент бір облысқа бара қалса,
Керемет дайын жерге апарады.
Екі күнде шұрқ тесік жолды жасап,
Таусылмайды қошамет шапалағы.
Көбі сылап, билерді мақтап сөйлеп,
Бітпейді-ау шалдардың да шапалағы.
Фархат Маратұлы. Астана, 8 шілде 2013 жыл.
«Нұреке, тапсырмаңыз тас-түйін» деп,
Айта алмайды шынайы сапаны әлі.
Содан кейін су жаңа үйлер құлап,
Сайтанның боп шығады-ау сапалағы.
Ал Фархат Маратұлы Қазақстандағы «жетпей жүрген нәрселерді» түгендеп шықты:
– Ол рас, талайларға үй жетпей жүр,
Ал енді біреулерге сый жетпей жүр.
Елбасының жарлығын орындауға
Қайран біздің үкіметке «күй» жетпей жүр.
Жақында премьер көкем «Бізде мұнай
аз боп тұр» деп мұрнына су жетпей жүр.
«Тағы 5 миллион тонна көп өндірсек,
Жеткілікті, толады бюджет» деп жүр.
Ағайын, анығына келер болсақ,
Біздерге мұнай емес, ми жетпей жүр.
