Оралдағы қарсылық митингісі белгіленген уақытта, белгіленген жерде басталды. Жергілікті сағат 12-де саябаққа бірнеше жүз адам келді. Оралдағы жиын - Қазақстандағы Жаңаөзен оқиғаларына қатысты рұқсат етілген алғашқы митинг.
Желтоқсанның 16-сында Жаңаөзенде болған қанды оқиғадан соң Орал қаласынан ішкі әскер тобын басқарып жеткен Батыс Қазақстан облыстық ішкі істер департаменті бастығының орынбасары полковник Бисен Төремұратов полицияға наразылық білдіруші әлдекімдердің әрекетінен жараланып қалған. Бірақ бұл оқиға туралы ақпарат осы кезге дейін көпшілікке белгісіз болып келген еді.
Орал қаласында «террористік топтың қызметіне қатысты» деп айыпталып отырған алты адамның бірі Нұрбек Ғабдуловтың анасы Гүлжиян Ғабдулова баласын «жәндікті де өлтіруге қимайтын адам» деп сипаттайды.
