18 мамыр күні Ақтөбедегі автокөлік бөлшектерін сататын «Көл-Auto» жабық базарының саудагерлері карантин шарттарын жеңілдетіп, жабық базардың жұмысын бастауға рұқсат беруді талап етті. Сауда орталығы жанына жиналған ондаған адам 30 наурыздан бері үйде отырып, қаржыдан қинала бастағанын айтты.

«Көл-Auto» жабық базарының саудагер Мұрат Еспаев «Билік қосалқы бөлшек сататын Ақтөбедегі өзге орталықтардың жұмысына рұқсат берді. Мысалы, «Илек» сауда үйі мен «Батыс Қазақстан» жәрмеңкесі (жұрт арасында ЗапКазЯрмарка деп аталып кеткен – ред.) жұмыс істеп тұр. Олардың аумағы бұл жерден анағұрлым үлкен» дейді.

Тағы бір кәсіпкер Мария Куркунованың айтуынша, «Көл-Аuto» жабық базары да 5 мамыр күні ашылып, екі тәуліктен соң қайта жабылған. Куркунованың сөзін «Көл-Аuto» орталығының өкілі Ирина Моисейченко де растап отыр.

- Қала әкімдігінен келген комиссия сауда орталығын аралап, «санитарлық талаптарға сай» деген тұжырымға келді. Қолымызға акт берген соң кәсіпкерлер жұмысына кірісті. 7 мамыр күні санитарлық-эпидемиологиялық мамандар келіп қайта жапты, - дейді орталық әкімшісі.

Моисейченконың сөзінше, «Көл-Аuto» екі мың шаршы метр аумақты алып жатыр. Орталықта жүзге жуық кәсіпкер қосалқы бөлшек сатады. Бұған дейін денсаулық сақтау министрлігі эпидемологиялық жағдай жақсарса, аумағы екі мың шарты метрді құрайтын сауда орындарын ашуға рұқсат берген.

Тауарлар мен көрсетілетін қызметтердің сапасы мен қауіпсіздігін бақылау департаменті өкілі Айсәуле Оралбаева Азаттыққа «Ақтөбе қаласында COVID-19 ауруының деңгейі 10-17 мамыр аралығында 7 пайыздан асып кетуіне байланысты кейбір орындардың ашылуы кейінге қалды. «Көл-Аuto» жабық базарының қашан ашылатынын нақты айта алмаймыз. Ол облыстағы эпидемиологиялық ахуалға байланысты» деді.

Тауарлар мен көрсетілетін қызметтердің сапасы мен қауіпсіздігін бақылау департаментінің мәліметінше, қазір Ақтөбеде ауыл шаруашылығы техникасының бөлшектерін сататын орталықтар, ғана жұмыс істеп тұр. Илек» сауда үйі мен «Батыс Қазақстан» жәрмеңкесінде де ауыл шаруашылық техникасын сататын орындар ашық.

- Бұл диқандардың қажеттілігін ескеріп, қабылданған шешім, - дейді Оралбаева.

Қазақстан денсаулық сақтау министрлігінің 18 мамырдағы мәліметіне сай, Ақтөбе облысында 228 адам коронавирус жұқтырған. 147 адам емделіп шықты. Ал ел бойынша 6440 адамнан вирус табылды. 3469 адам дерттен айықты. 35 адам қайтыс болды.

10 сәуірде Астанада Freedom Finance-тың "арам пиғылды қызметкерлерінен зардап шектік" деген азаматтар баспасөз жиынын өткізіп, жылдар бойы жинаған қаржыларын компанияның брокерлеріне сеніп тапсырып, ақырында алданып қалғандарын мәлімдеді.

Сондай азаматтардың бірі Жанна Қапарованың сөзінше, анасы Қарлығаш Қапарова 2019 жылдан бері 50 жыл бойы ауыр еңбекпен тапқан қаражатын компанияның қызметкеріне сеніп тапсырған, ақыр соңында қызметкер өзін тақыр жерге отырғызып кеткенін білген.

"Менің анам 50 жыл бойы патологоанатом-дәрігер болып жүріп, ауыр еңбекпен тауып, жинаған барлық ақшасын инвестицияға салған. Біз қызметкерге сенген жоқпыз, бірінші кезекте компанияға, Тимур Турловқа сенген едік. Біз қызметкердің үйіне барып, ақшаны берген жоқпыз. Біз ақшаны компанияның өзіне жібердік. Кейінірек анам ақшасын ала алмай қалған кезде, біз сияқты зардап шегушілер бар екенін білдік" деді Жанна Қапарова.

Баспасөз жиынында осындай алаяқтық әрекеттердің салдарынан шамамен 30 адам кемінде 2,5 млрд теңге шығынға батқаны айтылды.

Өзін компаниядан зардап шеккен азаматтардың бірі ретінде таныстырған Петропавл тұрғыны 84 жастағы зейнеткер Аида Лукиянова өмір бойы жиған-тергенінен айырылып, қазір еден жуып жүргенін айтты.

"Брокер Световойды (қазір тергеу жүріп жатыр - ред.) 15 жылдан бері БТА банкте істеп жүрген кезінен білемін. Ол менің менеджерім болды. Кейін ол Петропавлдағы Freedom Broker Service директоры болды. Бізде шынымен де сенім болды және бір-бірімізге жақын да тұрдық. Оның сөзінше, алты жыл бойы ол маған ақша тауып беріп жүрген екен. Мен оның кеңсесіне бардым, ол маған монитордан кірісімді көрсетті, акцияларым өсіп жатқанын айтты. 6 жыл бойы бірде-бір рет процентін болмаса негізгі соманы алып көрмеппін. Менде екі дәптер бар. Біріне долларлық акцияларды, екіншісіне теңгелік акцияларды жазып отырамын. Бірақ мен уәде етілген процентті де, ақшаны да көрген жоқпын. Бұған қоса, Световой мені және ұлымды оған ажырасқаннан кейінгі ауыр қаржылық жағдайына байланысты көмектесуге көндірді. Біз 6,5 млн теңге несиені рәсімдеп, оған бердік. Сол ақшаны да көрген жоқпыз. Қазір жинақсыз қалғанымызды айтпағанда сол несиені өтеуге мәжбүр болып отырмыз" деді жиын кезінде кемсеңдеп, көзіне жас алған Аида Лукьянова.

Жиын кезінде тағы бірнеше адам өздерінің бастан кешкендерін баяндады. Олар бұған дейін "жекелеген қызметкерлердің жағдайынан хабардар болмағанын" айтқан Freedom Finance иесі Freedom Holding корпорациясының басшысы Тимур Турловтың сөзіне күмәнмен қарайтынын жеткізді.

Олар құзырлы органдарды осы мәселелерге назар аударып, ақшаларын қайтарып беруге көмектесулерін сұрады. Президент Қасым-Жомарт Тоқаевқа қайырылып, қазір істі болып жатқан Freedom Finance-тің бұрынғы қызметкерлерінің ісін бақылауға алуды өтінді.

Бұған дейін ақпарат құралдарында "Freedom Finance қызметкерлерінің алаяқтық әрекеттері туралы" ақпарат шыққан. 3 сәуірде ҚазТАГ агенттігі жәбірленушілердің өкілінің мәлімдемесін жариялаған еді. Екі күннен кейін Freedom Finance мәлімдеме жасап, ақпарат құралдарында жарияланған мәлімет манипуляция екенін және шындыққа жанаспайтынын айтқан. Олар ресми хабарламада мұндай хабарламаларды "ұйымдастырылған ақпараттық шабуыл" деп бағалаған еді.

"Бірқатар интернет-басылымдардың материалдарында жалған және расталмаған ақпарат; эмоционалдық айыптаулар; бұрмаланған фактілер, олардың байланысы мен реттілігі; шын мәнінде зардап шекпеген адамдардың сөздері бар. Негізінде мұндай науқан – компанияның заңсыз «соттан тыс келісімге» қатысудан бас тартуына жауап ретінде жасалған PR-шабуыл. Компания басылымдардың біріне мақалаларды алып тастауды, теріске шығаруды және жалған ақпарат таратуды тоқтатуды талап етіп, сотқа дейінгі талап-арыз жолдады" деп жазылған компания хабарламасында.

Forbes тізіміндегі ең жас қазақстандық (37 жаста) Турлов Freedom Holding компаниясын басқарады. Мәскеуде туып-өскен және Қазақстанда тұратын Турлов 2022 жылы Қазақстан азаматтығын алған. Freedom Holding компаниясының негізін салушы әрі мажоритар акционері. 2022 жылы Ресей әскері Украинаға басып кіргеннен кейін Турлов өз компаниясы Ресей нарығынан кететінін мәлімдеген. Оның холдингі Қазақстанда "Фридом Банк" пен сақтандыру компанияларын бақылайтын "Фридом Финанс" акционерлік қоғамы арқылы жұмыс істейді.

Астанада полиция журналист Лұқпан Ахмедияровты ұстады. Ол бұл жөнінде Instagram-дағы парақшасында хабарлады. Ол өзін "қазақстандықтардың соғысқа қатысып жатқаны туралы" жазбасына байланысты ұстаған болуы мүмкін деп болжайды.

"Біз түсірілімде болғанбыз, қазір мені ұстады. Полицейлер келіп, көлікке күштеп отырғызды, шақыру, ештеңе берген жоқ" деді Ахмедияров.

Оның сөзінше, полиция оған қандай да бір қылмыстық іс барын айтқан.

Астана полициясы әзірге журналистің ұсталуына қатысты түсініктеме бермеді.

Журналист Динара Егеубаеваның айтуынша, Лұқпан Ахмедияровқа "көрінеу жалған ақпарат тарату" (274-бап, 3-бөлік) бабы бойынша айып тағылған. Журналист қорғануға құқығы бар куәгер статусына ие болған. Егеубаева іске журналистің Ресейге нәпақа табуға кетіп, төлқұжатсыз қалған 20 қазақстандық жөнінде жазбасы түрткі болғанға ұқсайды деп болжайды.

"Лұқпанға шыққан сол азаматтардың туыстары бұл ақпараттың шын екенін растаса дұрыс болар еді. Бірақ оларды "өңдеген" сияқты" деп жазды журналист.

Қазақстан бас прокуратурасы мәжілістің бұрынғы спикері Нұрлан Нығматулиннің жақын туыстарына қатысты қылмыстық істердің барысы туралы хабарлады.

“Нұрлан [Нығматулиннің] ұлы мен Ерлан Зайруллаұлына қатысты арыз түскен, қазіргі кезде қаралып жатыр. Қандай да бір нәрсе айту әзірге ерте. Арғын Нығматулинге қатысты – иә, істі бас прокуратура бюджет қаржысын жымқыру фактісі бойынша қарап жатыр. Осыған дейін Қарағанды облысының хоккей клубына бөлінген қаражат деп айттым. Оған халықаралық іздеу жарияланған. Оның жүрген жерін анықтағаннан кейін оны экстрадициялау мәселесі қаралады” деді бас прокурордың орынбасары Ғалымжан Қойгелдиев 10 сәуірде журналистерге.

Жуырда ақпарат құралдары мәжілістің экс-спикері Нұрлан Нығматулиннің ұлы Нұржан Нұрлановқа қарсы қылмыстық іс қозғалуы мүмкін екенін жазған еді. Оның алдында кәсіпкер Қанат Амиркин Нұржан Нұрлановты өзінен "Алатаудорстрой" компаниясын тартып алып, ақша бопсалады деп айыптаған. Кәсіпкердің өзі 1 сәуірде ҚазТАГ агентігіне тергеу жүріп жатқанын растаған.

Мәжілістің экс-спикерінің ұлы Нұржан Нұрланов Қаңтар оқиғасына дейін 2019 жылдың ақпан айынан бері "ҚазМұнайГаз-Аэро" компаниясының бас директоры болған. Ол бұл қызметтен 2022 жылы мамырда кетті. 2014 жылдың ортасында нарықта пайда болған "Қазмұнайгаз-Аэро" үкімет қаулысымен қарулы күштер мен ҰҚК шекара қызметіне, ұлттық гвардияға, төтенше жағдай министрлігіне бензин, дизель, мазут, авиация отынын тасымалдайтын бірыңғай оператор ретінде бекітілген еді.

"ҚазМұнайГаз-Аэроға" дейін Нұрланов 2018 жылдың қаңтарынан бері "Бәйтерек" ұлттық холдингі басқармасының мүшесі болды. Ол бұдан да басқа лауазымды орындарда отырған.

Нұржан Нұрлановтың өзі бұған дейін өзіне қатысты шыққан ақпараттарға қатысты ешқандай мәлімдеме жасаған жоқ. Оның қазір қайда екені белгісіз. Жуырда оппозициялық "Бәсе" арнасы оның Қазақстан азаматтығынан бас тартып, Дубайда тұрып жатқанын жазған.

Наурыздың басында мәжілістің бұрынғы спикері Нұрлан Нығматулиннің ағасы Арғын Нығматулинге халықаралық іздеу жарияланғанын Қазақстан бас прокуратурасы растаған.

69 жастағы Арғын Нығматулин 10 жылдай Қарағанды және Шығыс Қазақстан облыстарындағы "Жылжымайтын мүлік орталығын", ал 2006-2018 жылдар аралығында Қарағандыдағы "Сарыарқа" хоккей клубын басқарған. Былтыр клуб мемлекет балансына қайтарылған. Сол уақытта прокуратура оның жекеге өту заңдылығын тексеріп жатқанын хабарлаған. Арғын Нығматулин Қарағанды облыстық мәслихатының депутаты болған.

Арғын – ағайынды Нығматулиндердің үлкені. Бауыры Нұрлан Нығматулин 8 жыл Қазақстан парламентінің төменгі палатасы – мәжіліс төрағасы болды. Ол 2022 жылғы Қаңтар оқиғасынан кейін өкілетін тоқтатқан.

Қазіргі кезде 1077 қазақстандық өзге елдерде түрмелерде отыр, басым бөлігі - Ресейде. Бейсенбі күні сенаттың пленарлық отырысында бас прокурордың орынбасары Ғалымжан Қойгелдиев осылай деп мәлімдеді. Оның сөзінше, 77 адам жазаны өз елінде өтеу туралы өтініш берген.

"Өкінішке қарай қазір 1077 қазақстандық өз жазаларын шетелде өтеп жатыр. (Жазаны өз елінде өтеу туралы) осы келісімшартта көзделгендей, жазасын өтеп жатқан біздің азаматтардың өзінің келісімі қажет. Қазіргі кезде бізде 77 осындай өтініш-хат бар. Біз сол өтініштерді қарастырып жатырмыз" деді депутаттардың сұрақтарына жауап берген бас прокурордың орынбасары.

Қаңтар айында Қойгелдиев өз кезегінде Қазақстанда 900 шетел азаматы жазасын өтеп жатқанын айтқан еді.

Ақпаратқа қарағанда, сенат қабылдаған "Қазақстан Республикасы мен Кипр Республикасы арасындағы тұтқындарды беру туралы келісімді ратификациялау туралы» заң тұтқынды тапсыру мәселелерін және одан бас тарту негіздерін реттейді. Заң бойынша, тұтқынды өз еліндегі түрмеге ауыстыру үшін оның келісімі керек және онда сол елдің азаматтығы болуы керек. Егер бөтен елге келтірген шығыны болса, ол өтелуі керек. Егер шешімді шығарушы тарап тұтқынды тапсыру оның егемендiгiне, қауiпсiздiгiне немесе қоғамдық тәртiпке нұқсан келтiруi мүмкiн деп есептесе немесе сотталған адам үкiм бойынша келтiрiлген залалды өтемеген болса, не үкiм шығарушы елде сотталған адамға қатысты тергеу аяқталмаған болса, тұтқын берілмеуі мүмкін.

Бұған дейін Азаттық Ирак астанасы Бағдаттағы "Русафа" түрмесінде 2017 жылдан бері қамауда отырған қазақстандық алты әйел туралы жазған еді. Әйелдердің сөзінше, не тергеу болмаған, не үшін сотталғандарын да білмейді. Білместікпен адасқанын айтып, өткен ісіне өкінген жас әйелдер Қазақстан билігінен көмек күтетінін айтқан. Азаттық "Алты әйелдің тағдырына Қазақстан араласа ала ма, оларды елге әкелу мүмкін бе?" деп Қазақстан сыртқы істер министрлігі мен Ұлттық қауіпсіздік комитетіне сауал жолдаған еді. ҰҚК сыртқы істер министрлігіне сілтесе, министрлік "Иракта сотталған Қазақстан азаматтарының жағдайы тұрақты бақылауда екенін" мәлімдеген.

ОҚИ ОТЫРЫҢЫЗ

Ирак түрмесіндегі қазақстандық алты әйелдің өкініші мен үміті

Президент Трамп Қытайдан басқа АҚШ-тың көптеген сауда әріптестеріне импорттық тарифтерді уақытша тоқтатты.

Бейсенбі күні АҚШ президенті Дональд Трамп АҚШ-тың көптеген сауда әріптестеріне енгізген импорттық баж салығын 90 күнге тоқтататынын хабарлады. Ал Қытайдан келетін тауарларға салынатын баж салығы керісінше 104-тен 125 пайызға дейін көтерілді.

Бірнеше күн бұрын президент Трамп пен оның экономика жөніндегі кеңесшілері импорттық баж салығы ұзақ уақытқа енгізілетінін және ол Дональд Трамптың экономикалық саясатының маңызды құралы екенін айтқан.

Тарифтердің уақытша тоқтатылатыны туралы хабардан кейін Нью-Йорк қор биржасында акциялардың бағасы шарықтады. S&P қор индексі бір күнде 9 пайызға артып, осылайша 2008 жылғы қаржы дағдарысынан бергі ең үздік көрсеткішті көрсетті. Dow Jones индексі күн соңында 7,8% артты.

Тариф енгізілетіні жайлы хабар тарағалы бері акциялары арзандап келе жатқан Уолл-стриттегі акциялардың құны өткен аптада - Ақ үй тарифтерді ресми бекіткеннен кейін құлдилаған еді. Бес күн ішінде негізгі биржа индекстері 10 пайызға арзандады. Кейбір жетекші қаржылық сарапшылар АҚШ-тың биылғы жылғы оң экономикалық көрсеткіштерін теріске айналдырып, рецессия ықтималдығы жөнінде ескерткен болатын.

Президент Трамптың экономика жөніндегі кеңесшілері бұл қадам АҚШ-тың көптеген сауда әріптестерімен баж салығын төмендету бойынша келіссөзде көмектесуі мүмкін деп санайды.

Ал Қытайдан келетін тауарларға жаңа импорттық баж салығы сол күйінде қалмақ. Президент Трамп Қытай төрағасы Си Цзиньпиннен қоңырау күтетінін және онымен келіссөз жүргізуге дайын екенін мәлімдеді.

Украинаның арнайы қызметінде Ресей әскері қатарында Қытайдың кемінде 155 азаматы соғысып жүргені жөнінде мәлімет бар. Украина президенті Владимир Зеленский осылай деп мәлімдеді.

Оның сөзінше, Ресей билігі әлеуметтік желі арқылы келісімге қол қоюға шақыратын жарнама роликтерін таратып жатыр.

"Оларды қалай тартып жатқаны белгілі. Сондай схемалардың бірі – әлеуметтік желілер, атап айтқанда TikTok және өзге де қытайлық әлеуметтік желілер. Ресейліктер сол жақта жарнама роликтерін таратып жатыр. Ресми Пекин мұны біледі" деді Зеленский.

"Луганск" жедел-тактикалық тобының қоғаммен байланыс бөліміне сүйенген "Украинская правда" басылымы бұған дейін Донецк облысында тұтқынға түскен Қытай азаматтарының бірінің берген жауабы туралы жазған. Әскерилердің сөзінше, ол Ресей азаматтығын алу үшін соғысқа барғанын айтқан, ал дайындықтан Украинаның оккупацияланған Луганск облысында өткен. Ер адам Ресей әскеріне қосылу үшін Қытайдағы делдалға 300 мың рубль төлеген.

• 8 сәуірде Зеленский Донецк облысында Ресей жағында соғысып жүрген екі Қытай азаматы тұтқынға түскенін хабарлаған. Ол сыртқы істер министрі Андрей Сибигаға Пекинге дереу хабарласып, Қытайдың реакциясын білуді тапсырған. Украина сыртқы істер министрлігі Қытай істері жөніндегі сенімді уәкілді шақырып, түсініктеме сұраған.
• Бір күн бұрын Қытай сыртқы істер министрлігінің ресми өкілі Қытай өз азаматтары Украинаға соғысқа жібермегенін мәлімдеді.

9 сәуірде мәжіліс жаңа салық кодексі жобасын бірінші оқылымда мақұлдады. 76 депутат құжатты қолдады, жеті депутат қарсы болды. Тоғыз адам қалыс қалды, бір депутат дауыс берген жоқ.

Жаңа кодексте қосымша құн салығы көлемін 16%-ға дейін арттыру, оның межесін 40 млн теңге көлемінде бекіту қарастырылған. Депутаттар бұл өзгерістерді мақұлдады.

“Біріншіден, қосымша құн салығы 16 процент болады. Екіншіден, қосымша құн салығының шегі 40 млн теңге мөлшерінде белгіленеді. 40 млн теңге деген ортақ байлам болды. Үкімет пен депутаттардың конструктивті ұстанымының арқасында осындай ымыраға қол жеткіздік. Бірақ мұндай шек болғанда 160 мың салық төлеушіден айырылатынымызды айтқым келеді. Сондай шамамен 400 млрд теңгедей қосымша бюджет түсімінен қағыламыз. Біздің бизнесмендер үкімет те, парламент те осындай ымыраға баруға дайын екенін түсінсін деп айтып тұрмын" деді ұлттық экономика министрі Серік Жұманғарин.

Ресми ақпаратқа қарағанда, жаңа жобада 1,3 трлн теңгеден асатын 128 салық жеңілдігін алып тастау ұсынылып отыр. Салық саны мен өзге де міндетті төлемдерді қысқарту қарастырылған. Медицина саласында қосымша құн салығы тек ақылы қызметтерге салыну ұсынылып отыр. Әлеуметтік маңызы бар азық-түлік, кітап басып шығару, археология – қосымша құн салығын төлеуден босатылуы мүмкін. Жоба қабылданса, әлеуметтік саладағы корпоративтік табыс салығы – 2026 жылдан бастап 5%, ал 2027 жылдан бастап 10% болмақ. Корпоративтік табыс салығы банк секторы және ойын бизнесі үшін 25% болуы мүмкін.

Бұған қоса, "байлық салығы да" салынбақ. Жылжымайтын мүлік құны 450 млн теңгеден асқан мүлікке салық көлемін арттыру ұсынылып отыр.

"Құны 75 миллион теңгеден асатын автокөліктерге, сондай-ақ қымбат теңіз кемелері мен әуе кемелеріне акциз енгізу жоспарланып отыр" деді Серік Жұманғарин.

Екінші оқылымда тағы да өзгерістер ұсынылуы мүмкін деп айтылады.

Қазіргі қолданыстағы заң бойынша, жылдық тауар айналымы 73 млн 840 мың теңгеден асатын кәсіпкерлер ғана қосылған құн салығын төлеуге міндетті. Бұған дейін үкімет салықтың бұл түрін жылдық тауар айналымы 15 млн теңгеден басталатын кәсіпкерлерге енгізуді ұсынған.

Жұрт әлеуметтік желіде үкіметтің бастамасын сынға алған. Сарапшылар салық ауыртпалығы қатардағы тұтынушыға түседі деді.

Қазақстан президенті Қасым-Жомарт Тоқаев 7 ақпанда елдегі бизнес өкілдерімен кездесуде үкімет ұсынған ҚҚС мөлшері тым жоғары деп, бұл мәселені зерттеуді әрі биыл нақты шешім қабылдауды тапсырған.

Қосымша құн салығы – Қазақстанда сатылатын тауарлар (отандық және шетелден әкелінген) мен көрсетілетін қызмет бағасына қосылған жанама салық түрі, мемлекеттік бюджет кірісінің маңызды көздерінің бірі.

Қытай өз азаматтарын Украинадағы соғысқа жібермегенін мәлімдеді. Қытай сыртқы істер министрлігінің ресми өкілі Линь Цзяньнің сөзінен үзіндіні ресейлік ТАСС агенттігі жариялады.

“Қытай үкіметі әрдайым өз азаматтарынан [Украинадағы] қарулы қақтығыс аймақтарына бармауды, кез келген түрде араласпауды, кез келген тараптың әскери операцияларына қатыспауды талап етіп келеді” деді ол.

Бұған дейін Украина президенті Владимир Зеленский Украинаның қарулы күштері “Ресей жағында соғысқан Қытайдың екі азаматын тұтқынға түсіргенін” мәлімдеген. Оның сөзінше, Ресей жағында соғысып жүрген Қытай азаматтары бұдан да көбірек болуы мүмкін.

Осыған дейін Украина Солтүстік Корея солдаттарын тұтқынға түсірген еді.

Тұтқынға түскен ҚХР азаматтарын Украинаның Қауіпсіздік қызметі тергейді.

Ресейдің Орынбор облысындағы Қазақстанмен шекарадағы "Сагарчин" өткізу-бақылау бекетінде 500-ден астам Тәжікстан азаматының Ресейге өте алмай тұрғанына аптадан асқан. Азаттықтың Тәжік қызметінің (Озоди радиосы) дерегінше, Ресей шекарашылары еш себебін түсіндірместен оларды кіргізбей қойған. Адамдар көлікте қонуға мәжбүр, арасында әйелдер мен балалар да бар, ал билік болса оларға жәрдем танытуға асығар емес деп хабарлады Озоди радиосы.

Айтуларынша, Ресейде тұрып жатқан бұл адамдардың көбі сол елде болу мерзімін ұзарту үшін Қазақстан аумағына уақытша өтіпті. Бұл – Тәжікстаннан Ресейге жұмыс істеуге барған мыңдаған еңбек мигрантының әр 90 күн сайын жасайтын әрекеті. Ресей заңы оларға 90 күннен аспайтын мерзімге ғана визасыз жүріп-тұруына рұқсат етеді. Алайда бұл жолы олар Қазақстанға шығып кетіп, кейін Ресейге қайта оралмақ болған кезде Ресейдің шекара қызметі кіргізбей қойған, себебін түсіндірмеген.

"Кейбір жігіттер мұндай бір аптадан бері тұр. 200 көлік өте алмай тұр. Өзбекстандықтар өтті, қырғызстандықтар да өтті, себебі олардың елшіліктерінің өкілдері көмекке келді. Ал бізден ешкім жоқ", – деді 8 сәуірде Озоди тілшісі сөйлескен, аты-жөнін атамауды өтінген тәжік мигрант.

Қырғызстан тарапының өкілдері өз азаматтарына әлгіндей шектеуді Ресей жағы минералды тыңайтқыштар контрабандасы әшкере болуына байланысты шекарадағы бақылауды уақытша күшейткен деп түсіндірген. Алайда тәжік мигранттар ондай ресми ақпарат алмағанын айтып, алда не болатынын, әлі қанша күтуге тура келетінін біле алмай әрі-сәрі күйде отыр.

Тәжікстанның дипломаттарымен байланыс орнату да мүмкін болмай отыр. Озоди тілшілері Тәжікстанның Қазақстандағы елшілігіне бірнеше мәрте телефон соққанымен ешкім жауап бермеді.

Шекарада бөгеліп тұрған адамдардың кейбірі Тәжікстаннан Ресейге жеке көлігімен жолға шыққан, ал енді біреулері Ресейде визасыз жүру мерзімін ұзарту үшін Қазақстанға уақытша шығып, содан кейін Ресейге кері оралмақшы болған кезде шекарадан өте алмай қалған.

Үкімет қосымша құн салығы бойынша межені бұрын ұсынылған 15 миллион теңгенің орнына 40 миллион теңге деп белгілеу туралы шешім қабылдады. Бұл жөнінде сәрсенбі күні ұлттық экономика министрі Сері Жұманғарин мәлімдеді.

15 млн теңгелік межеге кәсіпкерлер мен парламенттегі екі партия өкілдері қарсы шыққан.

“Бірінші, қосымша құн салығы 16 процент болады. Екінші, қосымша құн салығының шегі 40 млн теңге мөлшерінде белгіленеді. 40 млн теңге деген ортақ байлам болды. Үкімет пен депутаттардың конструктивті ұстанымының арқасында осындай ымыраға қол жеткіздік. Бірақ мұндай шек болғанда 160 мың салық төлеушіден айырылатынымызды айтқым келеді. Сондай шамамен 400 млрд теңгедей қосымша бюджет түсімінен қағыламыз. Біздің бизнесмендер үкімет те, парламент те осындай ымыраға баруға дайын екенін түсінсін деп айтып тұрмын" деді ол.

Қазіргі қолданыстағы заң бойынша, жылдық тауар айналымы 73 млн 840 мың теңгеден асатын кәсіпкерлер ғана қосылған құн салығын төлеуге міндетті. Бұған дейін үкімет салықтың бұл түрін жылдық тауар айналымы 15 млн теңгеден басталатын кәсіпкерлерге енгізуді ұсынған.

Жұрт әлеуметтік желіде үкіметтің бастамасын сынға алған. Сарапшылар салық ауыртпалығы қатардағы тұтынушыға түседі деді.

Қазақстан президенті Қасым-Жомарт Тоқаев 7 ақпанда елдегі бизнес өкілдерімен кездесуде үкімет ұсынған ҚҚС мөлшері тым жоғары деп, бұл мәселені зерттеуді әрі биыл нақты шешім қабылдауды тапсырған.

Қосымша құн салығы – Қазақстанда сатылатын тауарлар (отандық және шетелден әкелінген) мен көрсетілетін қызмет бағасына қосылған жанама салық түрі, мемлекеттік бюджет кірісінің маңызды көздерінің бірі.

ОҚИ ОТЫРЫҢЫЗ

"Мемлекет көз жұма қарап отыр". Қазынаны ҚҚС-ті көтеріп толтыруға көпшілік неге қарсы?

Ресей Украинаға соғыс бастағалы бері Қазақстанның Киевтегі елшілігі төрт қазақстандықтың сүйегін елге жеткізуге көмектескен. Қазақстанның сыртқы істер министрлігі "Власть" сайтына берген жазбаша жауабында осылай деп мәлімдеген. Марқұмдардың қалай қаза болғаны белгісіз. Министрліктің айтуынша, олар соғысқа қатыспаған.

"2022 жылдың ақпан айынан бастап Қазақстанның Украинадағы елшілігі соғысқа қатысы жоқ төрт қазақстандықтың сүйегін тасымалдау үшін қажет құжаттарды дайындауға көмектесті" деп жазған министрлік жауабында.

Басылым сонымен бірге Қазақстанның ішкі істер министрлігі "Украинадағы соғыста Ресей жағында соғысып жүр" делінген 661 қазақстандық туралы мәліметке қатысты жауап бермегенін жазды.

Жуырда Украина қорғаныс министрлігіне қарасты "Хочу жить" ("Өмір сүргім келеді") орталығы Украинада Ресей жағында соғысып жүрген қазақстандықтар делінген 600-ден астам адамның аты-жөнін жариялаған еді. Орталықтың мәліметінше, 2022 жылдан бері Украинадағы соғысқа 661 Қазақстан азаматы қатысқан, кемінде 78-і қаза тапқан. Аталған орталық мәліметті Ресей әскеріндегі аты-жөні аталмаған тұлғалардан алғанын айтқан.

Қазақстанның ішкі істер вице-министрі Игорь Лепеха өткен аптада журналистерге "әуелі бұл мәліметтің рас-өтірігін тексеру керек" деген болатын.

ОҚИ ОТЫРЫҢЫЗ

Алдаған, арбаған, қорқытқан. Украинада соғысқа қатысты деген 661 қазақстандықтың тізімі шықты

Қытайға қарсы тұру – президент Трамптың сыртқы саясатындағы басымдықтарының бірі.

АҚШ Украинадағы соғыста Қытай азаматтарының Ресей жағында соғысып жатқаны туралы ақпаратқа алаңдайды деп мәлімдеді АҚШ мемлекеттік департаментінің өкілі Тэмми Брюс.

"Қытай сарбаздарының тұтқынға алынғаны алаңдатады. Қытай – Украинаға қарсы соғыста Ресейді демеп отырған басты мемлекет. Қытай Ресейге соғысты жалғастыру үшін қажет қос мақсаттағы тауарлардың 80 пайызға жуығын жеткізеді" деді АҚШ мемлекеттік департаменттің баспасөз хатшысы Тэмми Брюс.

Ол қытайлық навигация құралдарын, жартылай өткізгіштер мен ұшақ бөлшектерін мысалға келтірді.

"Осы екі ядролық держава арасындағы ынтымақтастықтың жалғасуы халықаралық тұрақсыздықты тереңдете түседі" деді Тэмми Брюс.

Сарапшылардың айтуынша, Киев Қытай азаматтарының Украинадағы соғысқа қатысып жатқаны туралы мәліметті алғаш рет айтып отыр. Мәскеумен тығыз қарым-қатынас орнатқан ресми Пекин Ресейге көмектесіп отырғанын мойындамайды.

Украина әскері Ресей жағында соғысып жүрген Қытайдың екі азаматын тұтқынға түсіргенін мәлімдеді. Бұл жөніне Украина президенті Владимир Зеленский өз телеграм-арнасында жазды.

Оның айтуынша, Қытайдың екі азаматы Украина аумағы - Донецк облысында тұтқынға түскен. Олардың құжаттары, банк карталары бар, жеке мәліметтері белгілі деп жазды Зеленский. Соғысып жүрген қытайлық бұдан да көп болуы мүмкін деген ақпарат бар.

"Украина сыртқы істер министріне тез арада Пекинмен хабарласып, Қытай бұған қалай жауап беретінін сұрауды тапсырдым" деп жазды Зеленский.

Соғыс жағдайында бұл ақпаратты растауға не терістеуге мүмкіндік жоқ. Әзірге бұл бойынша Ресей мен Қытайдан реакция болған жоқ.

Осыған дейін Украина Солтүстік Корея солдаттарын тұтқынға түсірген еді.

Тұтқынға түскен ҚХР азаматтарын Украинаның Қауіпсіздік қызметі тергейді.

ОҚИ ОТЫРЫҢЫЗ

Деррик Нгамана. Ресей әскеріне жалданып, соғысқа барған африкалықтың өлімі нені көрсетті?

Қазақстанның ішкі істер министрлігі шетелде соғыс қимылдарына қатысқан ел азаматтары заң алдында жауапқа тартылатынын ескертті. ІІМ елдің Қылмыстық кодексінде "Шетелдік қарулы қақтығыстарға қатысу" (172-бап) және "Жалдамалылық" (170-бап) деген екі бап барын еске салған. Бірінші бап бойынша тоғыз жылға дейінгі мерзімге бостандығынан айыру жазасы, екіншісі бойынша өмір бойына түрме жазасы қарастырылған.

"Ішкі істер министрлігі азаматтарға Қазақстан Республикасының заңдарын сақтауға және құқықтық салдары ауыр болуы мүмкін іс-әрекетке қатысудан аулақ болуға кеңес береді", — деп жазылған министрлік хабарламасында.

ІІМ бұл ескертуді украиналық блогер Владимир Золкиннің Украинадағы соғыс барысында тұтқындалған, өздерін "қазақпыз" деп атаған үш жас жігітпен сұхбатының видеосы желіде жарияланғаннан кейін жасады. Золкин сұхбаттасқан адамдардың екеуі өздерін Қазақстан азаматымыз деп, ал үшінші адам Ресейдің Қазақстанмен шектесетін облысының тумасымын, ұлтым қазақ деп таныстырған. Үш жігіттің де аты-жөні жарияланбады.

Желіде жарияланған видеода сөйлеген қазақстандықтардың бірі Ресей азаматтығы алу үшін әскери келісімшартқа қол қойғанын, бірақ оған Ресей төлқұжаты берілмегенін айтты. Ол Украинаның Луганск облысында тұтқынға түскен. Екінші қазақстандық жігіттің сөзінше, ол Донецк облысындағы Торецк қаласы үшін болған шайқас кезінде тұтқынға түсіпті.

Бұған дейін украиналық "Өмір сүргім келеді" ("Хочу жить") жобасы Украинада Ресей жағында соғысқан немесе шайқасып жатқан Қазақстан азаматтарының тізімін жариялаған еді. Тізімде 661 адамның аты-жөні аталған. Жоба деректері бойынша, 2024 жылдың аяғындағы мәлімет бойынша, ол тізімдегі 78 адам қаза тапқан деп есептеледі.

ОҚИ ОТЫРЫҢЫЗ

Алдаған, арбаған, қорқытқан. Украинада соғысқа қатысты деген 661 қазақстандықтың тізімі шықты

Қазақстан билігі 2022 жылы Ресейдің Украинаға жасаған басқыншылығын ашық түрде айыптаған жоқ, бірақ елдің заңдары бойынша, шетелдегі соғысқа қатысу заңсыз әрекетке жатады.

Қазақстандық бұқаралық ақпарат құралдары Ресей қарулы күштері қатарына немесе атышулы "Вагнер" жалдамалы әскер тобына қосылып, Украинадағы соғысқа аттанған қазақстандықтар туралы біршама материал жариялаған.

ОҚИ ОТЫРЫҢЫЗ

"Вагнер" тобы қатарына Қазақстаннан адам тартады. Мемлекет неге тосқауыл қоймайды?

Пекин АҚШ президенті Дональд Трамптың Қытайдан әкелінетін импорт тауарларға қосымша 50 пайыз баж салығын енгізу саясатына қарсы "соңына дейін күресуге" бел байлап отыр деп хабарлады Reuters агенттігі.

Содан бір күн бұрын Трамп өзінің Truth Social әлеуметтік желісінде Қытайдан әкелінетін импорт тауарларына салынатын 54 пайыздық баж салығы тағы 50 пайызға артуы мүмкін екенін мәлімдеген. АҚШ президенті мұндай шараны Пекин америкалық импортқа 34 пайыздық баж салығын енгізетін болса қабылдаймын деген. Кейін Трамп ондай ниеті барын Ақ үйдегі баспасөз мәслихатында растады.

Егер ол сөзі іске асатын болса, АҚШ-тың Қытайдан әкелінетін импорт тауарларға салатын баж салығы 104 пайызға жетпек: оның 20 пайызын Трамп наурыз айында, ал оған қосымша тағы 34 пайызын өткен аптада енгізген.

"АҚШ Қытайға қарсы баж салығын көтерем деп, қате үстіне қате жасап жатыр, бұл АҚШ-тың бопсашыл сиқын тағы да көрсетті. Егер АҚШ өз дегенінен қайтпайтын болса, Қытай соңына дейін күреседі", – деп мәлімдеді Қытайдың сауда министрлігі.

Бұған қоса Еуропа одағы АҚШ-тан әкелінетін бірқатар тауарға 25 пайыздық баж салығын енгізуді жоспарлап отыр, деп жазды Bloomberg. Басылымның хабарлауынша, Еурокомиссия құжаттарында баж салығы мөлшерін арттыру ұсынылған ондаған тауар түрі аталған. Бұған дейін Reuters агенттігі Еуроодақ АҚШ-тан алатын ет, дақылдар, шарап, ағаш, киім-кешек, сағыз, әжетхана қағазы және басқа да тауарларға көтеріңкі баж салығын енгізуді жоспарлап отыр деп хабарлаған еді.

Bloomberg мәліметі бойынша, кейбір тауарға 25 пайыздық баж салығы 15 сәуірден бастап енгізу көзделген, бірақ негізгі қарымта шаралар мамыр айының ортасында күшіне енбекші.

АҚШ президенті Дональд Трамп 2 сәуірде Американың сауда серіктестерінің басым көпшілігіне қарсы баж салықтары енгізілетінін жариялаған. Атап айтқанда, Еуроодақ елдерінен АҚШ-қа әкелінетін импорт тауарларға 20 пайыздық баж салығы енгізілді. Ұлыбританиядан алынатын тауарларға 10 пайыздық баж салығы енгізіледі деп айтылды, ал кейбір елдерден әкелінетін тауарларға 40 пайызға дейін баж салығы салынады.

Еуроодақ билігі АҚШ-пен баж салығына байланысты келіссөздер жүргізуге дайын екенін айтты. Еурокомиссия жетекшісі Урсула фон дер Ляйен Еуроодақ АҚШ-қа өнеркәсіп тауарларынан екіжақты баж салығын алып тастауды ұсынғанын, бірақ "ол ұсынысқа тиісті жауап алынбағанын" айтты.

ОҚИ ОТЫРЫҢЫЗ

Еуроодақ АҚШ-пен импорт тарифі бойынша келіссөз жүргізуді жөн санайды