Кабул әуежайындағы эвакуация орталығында 21 тамыз күні де бейберекет болды. Британиялық Sky News телеарнасы сарбаздардың елден кетемін деп опат болған адамдар мәйітін материалмен жауып жатқанын көрсетті. Күн ыстықта кептеліске тап болған ауғандарға сарбаздар сусын беріп, күн қызуынан әлі кеткендерге құбыршектен су шашты. 15 тамыз күні тәліптер Кабулге кіріп, Ауғанстан билігін қолына алғанын мәлімдеген соң, "Талибаннан" қорыққан тұрғындар елден кетуге асықты. Кабул әуежайының бетон қабырғаларына күн сайын мыңдаған адам келіп жатыр. Бәрі эвакуацияға ілігіп кетуден үмітті.